Pinadayawan Dagiti Agtuturay Dagiti Saksi

DIAY Cádiz, España, maysa a puerto a siudad a masarakan agarup 500 a kilometro iti abagatan a laud ti Madrid, impaayan ni mayor Doña Teófila Martínez iti plake (naipakita ti ladawan iti ngato) dagiti Saksi ni Jehova. Kastoy ti mabasa iti dayta: “Ipaay ti city hall ti Cádiz kadagiti Saksi ni Jehova kas panangapresiar iti pannakitinnulong ken ar-aramidenda maipaay iti daytoy a siudad.” Ania ti inaramid dagiti Saksi ta maikarida nga umawat iti daytoy a pammadayaw?

Naited daytoy kas panangbigbig iti inaramid dagiti Saksi a panangtarimaan iti dadduma a paset ti munisipal estadium ti siudad. Kadagiti sumagmamano a ngudo ti lawas, ginasut kadagiti Saksi ti nagboluntario a timmulong a mangpabaro kadagiti kasilias iti umuna a kadsaaran ti football stadium ti Carranza. Mabenepisiaran amin a mangusar iti estadium ita kadagiti tubo, plumbing fixture, ken ti suelo a naikabil.

Nabayag bassiten a tagtagiragsaken dagiti Saksi ni Jehova ti nasayaat a relasion iti siudad ti Cádiz. Kada tawen, siaayat nga ipapausar ti city hall ti Carranza Stadium kadagiti Saksi para iti tinawen a kombension distritoda. Gapuna, maragsakan dagiti Saksi a mangaramid iti inggat’ kabaelanda a tumulong a mamagtalinaed iti estadium iti nasayaat a kasasaad.

Nupay kasta, mainayon pay iti sagpaminsan a panagobrada, regular a bisbisitaen dagiti Saksi ni Jehova dagiti kaarrubada iti siudad tapno matulonganda dagiti umili iti sabali a wagas. Iwarwaragawagda ti “naimbag a damag” ti Pagarian ti Dios. Siempre, saanda nga ar-aramiden ti publiko a ministerioda tapno padayawan ida dagiti tattao. Itungtungpalda daytoy kas panagtulnog iti bilin ni Jesus nga ikasaba ti “naimbag a damag ti pagarian” ken ‘mangaramid kadagiti adalan a tattao iti isuamin a nasnasion.’ (Mateo 24:14; 28:19) Iti kastoy a pamay-an, namnamaen dagiti Saksi ni Jehova a makapagserbida iti komunidad babaen ti panangisuroda kadagiti tattao iti “dalan ti kinalinteg.”​—Proverbio 12:28.