Sangalubongan a Talna—Paggubuayanna?
MARAGPAT ngata ti sangalubongan a talna no pagbalinen a sapasap ti edukasion ken relihion? Daytoy ti tartarigagayan ni Dr. Robert Muller, dati nga assistant secretary-general ti Naciones Unidas ken immawat iti 1989 UNESCO Prize for Peace Education. Kas naipadamag iti diario a The Vancouver Sun, “kombinsido [ni Dr. Muller] nga amin nga estudiante ditoy lubong masapul nga adda kursoda maipapan kadagiti kinapudno ken prinsipio maipanggep iti planeta, kinatao ken di panangranggas.” Sirsirmataenna ti aldaw nga amin nga eskuelaan iti intero a lubong isurodanto kadagiti ubbing a ti NU ti kasayaatan a pangnamnamaan iti talna. Patienna pay nga “amin a relihion ditoy lubong agbalinda koma a kameng ti kabubuangay a kasla NU nga organisasion a maawagan Dagiti Nagkaykaysa a Relihion,” impadamag ti Sun. Ta no kasta, “amin a narelihiosuan a pannursuro itandudodanto ti di panangranggas.”
Pumudnonto met la ngata ti sangalubongan a talna? Wen! Ngem saan a babaen ti aniaman a natauan nga ahensia. Nasurok a 2,700 a tawenen ti napalabas, dinakamat ti napaltiingan a mannurat ti kangatuan a gubuayan ti edukasion iti talna idi impadtona nga ‘isuronto ni Jehova’ dagiti nasingpet a tattao, ket “dakkelto” ti talnada.—Isaias 54:13.
Ti Dios ti “mangipaay iti talna,” kuna ti Biblia. (Roma 16:20) Uray ita madaman ti nakaskasdaaw a sangalubongan a programa a panangisuro bayat a sursuruan ni Jehova dagiti tattaona a ‘sapulenda koma ti talna ket surotenda dayta,’ a ‘pandayenda dagiti kamkampilanda a pagbalinen a dingding ti arado,’ ket didan ‘adalen ti pannakigubat uray kaano.’—1 Pedro 3:11; Isaias 2:2-4.
Anamongan ken bendisionan ti Dios ti panagdayaw a naibatay iti kinapudno, nga awanan panaginsisingpet ken panangallilaw. (Mateo 15:7-9; Juan 4:23, 24) Ti laeng pudno a panagdayaw, a naan-anay a maitunos iti Sao ti Dios, ti makapataud kadagiti tattao nga agbiag a sitatalna ken agkaykaysa ken addaan iti pudpudno a panagayat iti maysa ken maysa.—Juan 13:35.
Tapno ad-adu pay ti maammuanyo maipanggep iti kuna ti Sao ti Dios maipapan iti sangalubongan a talna, awisendakayo nga agsurat kadagiti agipabpablaak iti daytoy a pagiwarnak.