Rasismo ken Relihion

IDI simmangpetak idiay E.U. idi 1978, kunak no nabayagen a nasolbar ti America ti parikutna maipapan iti puli, a saanen a maidumduma dagiti nangisit,” kinuna ni Mark Mathabane, maysa a mannurat a nayanak idiay South Africa, iti maysa nga interbiu ti magasin a Time. “Napaneknekak a pudno dayta iti adu a pamay-an. Kasla nakaabante unayen ti E.U. no idilig iti South Africa. Ngem nasdaawak idi a matakuatak nga awan unay nagbaliwan dagiti tattao.” Aniat’ nangiturong kenkuana iti dayta makakellaat a natakuatanna?

“Ti alas 11:00 t.b. ti Domingo ti maysa kadagiti oras idiay America a nakaro ti panaglalasinlasin,” kinuna ni Mathabane. Nadlawna nga uray iti kapilia, agkitakit dagiti tattao a makipagdayaw kadagidiay sabali ti pulida. “Kasano ngata ti panagriknada kadagiti sabali a puli no iti sabali nga al-aldaw ti lawas?” inyimtuodna. Kas panangiparegtana nga edukasion ti makaipaay iti panagbalbaliw, kinuna ni Mathabane: “Babaen ti edukasion masursurom nga awaten nga agpapada dagiti tattao.”

Umanamong dagiti Saksi ni Jehova a ti edukasion ti solusion, ngem nangnangruna nga iparegtada ti edukasion a naibasar iti Sao ti Dios. Wen, ti Biblia ti tumulong kadakuada a mangparmek iti panangidumduma iti puli​—uray kadagiti pagilian a nakaro ti etniko a panangbusor. Kada lawas kadagiti Kingdom Hall-da, agtataripnong dagiti tattao manipud iti nadumaduma a puli ken nasion tapno masursuruanda kadagiti linteg ken prinsipio ti Sao ti Dios, ti Biblia. Awan ti panagkolekta iti kuarta kadagitoy a gimong. Maawiskayo a tumabuno!