“Binaliwanyo ti Panangmatmatko Kadagiti Saksi ni Jehova”
KASTA ti reaksion ti maysa nga opisial ti pagbaludan idiay Poland iti maysa nga artikulo maipapan iti trabaho dagiti Saksi ni Jehova, kas naipadamag iti Oktubre 15, 1998 a ruar daytoy a magasin. Ti artikulo a “No Umimdeng Dagiti Pimmamulinawen a Puso,” insalaysayna ti naballigi a panangasaba dagiti Saksi ni Jehova kadagiti balud idiay Wołów, Poland.
Sakbay a nairuar iti publiko ti nadakamat a magasin a Pagwanawanan, naangay ti maysa nga espesial a taripnong idi Setiembre 13, 1998 iti pagbaludan sadi Wołów tapno maikkan dagiti balud iti magasin. Naawis a tumabuno dagiti lokal a Saksi, dagiti bautisado ken dadduma nga interesado a balud, ken sumagmamano nga opisial ti pagbaludan. Adtoy ti dadduma kadagiti komento dagidiay timmabuno.
Kastoy ti kuna ni Jerzy, maysa kadagiti Saksi ni Jehova a nabautisaran iti pagbaludan nasurok a lima a tawenen ti napalabas: “Maragsakanak unay a makabasa iti panagregget dagiti kakabsat kadagiti kabangibang a kongregasion a tumulong kadakami.” Kinunana pay: “Agtultuloy nga ikagkagumaak a pasayaaten ti katataok, ket makitak no kasano ti panangsukog ni Jehova kaniak.”
Adda maysa pay a balud, nga agnagan Zdzisław, a nagkuna iti kastoy maipapan iti panangasaba iti pagbaludan: “Iti agdama, adda uppat a balud nga agsagsagana para iti bautismo, ken agtultuloy dagiti kabbaro nga interesado a tumabtabuno kadagiti gimong iti pagtataripnonganmi. Ginutugotnakami iti kasta unay daytoy nga artikulo a mangitultuloy iti trabahomi iti daytoy a tay-ak.” Anian a nagsayaat ti panangmatmat ni Zdzisław idinto ta 19 a tawen pay ti panagyanna iti pagbaludan!
Idi nabasana ti artikulo maipapan iti pagbaludan sadi Wołów, kinuna ti maysa nga opisial ti pagbaludan: “Mapadayawankami unay. Diak impagpagarup a makaawat daytoy a pagbaludan iti paborable a publisidad iti 130 a pagsasao iti lubong. Magustuankayo, ket apresiarek ti panagreggetyo a tumulong kadagiti balud.” Innayon ti maysa pay nga opisial: “Binaliwanyo ti panangmatmatko kadagiti Saksi ni Jehova. Relihioso a panatiko ti pangibilangak idi kadakayo. Makitak itan a nataknengkayo gayam a tattao.”
Immisem sa kinuna ti direktor ti pagbaludan iti Wołów a ni Marek Gajos: “Idi damo impagarupmi a bassit la ti maaramidanyo. Impagarupmi nga awan nakaidumaanyo kadagiti dadduma a relihion nga agtarigagay a mamagbalbaliw kadagiti balud babaen ti panangisuro iti Biblia kadakuada. Ngem idi makitami ti resulta ti damo a panangasabayo, inkeddengmi ti makitinnulong. Siam a tawenen a dikay mabannog nga um-umay ditoy, ket apresiarek unay ti nagapuananyon.”
Ngem ania ti reaksion ti kaaduan a balud idiay Wołów idi mabasada ti artikulo? Interesado unay dagiti balud nga uray la naibus ti magasin a suplay dagiti Saksi iti pagbaludan. Nangipakita met iti interes dagiti opisial ti pagbaludan babaen ti panagkiddawda iti 40 a kanayonan a kopiada. Gapu ta dakkel ti panagkasapulan, timmulong dagiti kongregasion iti dayta a lugar ket nangtedda iti 100 a kanayon a kopia a para kadagiti kakabsat nga adda iti pagbaludan. Immadu met dagiti makigimgimong.
Kastoy ti kinuna ni Piotr Choduń, maysa nga opisial ti pagbaludan a makitintinnulong a naimbag kadagiti Saksi ni Jehova: “Inkeddengmi nga iparang daytoy nga artikulo iti amin nga estante iti pagbaludanmi. Mangnamnamakami nga amin dagiti balud a saan pay a makipagad-adal iti Biblia kadakayo basaenda met ti magasin.”
Agtultuloy nga adda naimbag a resulta ti nasayaat nga ulidan dagiti Saksi ken ti napinget a panangasabada. Malaksid iti 15 a balud a nabautisaranen, adda 2 nga opisial ti pagbaludan a nangidedikar iti biagda ken Jehova, ket nagkiddaw a mayadalan iti Biblia ti maysa pay nga opisial ti pagbaludan. Siempre, bigbigen dagiti kakabsat a mangaskasaba iti pagbaludan idiay Wołów a ni Jehova a Dios ti namagballigi kadakuada.—Idiligyo ti 1 Corinto 3:6, 7.
[Ladawan iti panid 28]
Tallo a Saksi ken maysa a balud bayat ti pannakaipresenta dagiti magasin iti lecture hall ti pagbaludan