“Nabileg a Takder a Ginutugot ti Pammati”

NAIRUAR idi 1998 ti pinadayawan dagiti kritiko a baro a libro iti Pranses a napauluan Les Témoins de Jéhovah face à Hitler (Jehovah’s Witnesses in the Face of Hitler), nga insurat ni Guy Canonici. Iti pakaunana iti libro, insurat ti mararaem unay a Pranses a historiador a ni François Bédarida: “Nakasaysayaat unay daytoy a libro. Saan la a gapu ta punnuanna ti kurang, no di pay ket naintiempuan ti pannakairuarna. . . . Malaksid kadagiti espesialista, siasino ti makaammo iti sinagaba dagiti Saksi ni Jehova iti sidong ti Third Reich? Ngem iti uneg ti 12 a tawen dayta a turay, naidadanesda buyogen ti di agsarday a kinarungsot ken kinaranggas. Napasaranda met ti kinaaprang dagiti kampo konsentrasion. Nagdakkel met ti napukawda gapu iti pammati ken kombiksionda. Apay a saan a nadakamat iti historia dagitoy a Kristiano? . . .

“Apay nga adda ti kasta a brutal ken sistematiko a panangidadanes iti bassit, naiwarawara, ken di napeggad a sekta? Daytoy ti napateg a punto iti karkarna a kasasaad. Saan la a bassit ti bilang dagiti Saksi idiay Alemania no idilig iti populasion​—ipakita ti estadistika nga agarup 20,000 ti bilangda iti nasurok nga 60 a milion nga umili​—no di ket mannakikappiada amin a raemenda ti linteg ken dida pangtaan ti asinoman, ket kayatda laeng ti agtrabaho ken padakkelen dagiti annakda iti umiso a pamay-an. . . .

“Daytoy a panangidadanes ti naipasango kadagiti manamati a napinget ken natibker ti espiritualidadda nga agkedked. Ti makin-uneg a puersa ti pammatida ken Jesu-Kristo daeranna dagiti makinruar nga impluensia, mangrugi iti pisikal a kinaranggas dagiti polis ti Estado​—a dumanon iti kinabannuar ken kinamartir.”

Makapikapik ti pakasaritaan dagiti Saksi ni Jehova a nagsagaba kas martir gapu iti Nakristianuan a pammatida iti laksid ti narelihiosuan a panangimameg. Iti panangrepasona iti libro, ti La Croix, maysa a nalatak a Pranses a pagiwarnak dagiti Katoliko, innayonna dagitoy makatukay a sasao: “Nupay di unay ammo ti pakasaritaanda, nabaelan ni Guy Canonici nga inurnong ti adu a testimonia a mamagsiddaaw iti maysa gapu iti kasta a nabileg a takder a ginutugot ti pammati a nayebkas iti kasisimplean a sasao, ti di maduprak a pammati agingga ken patay uray kadagiti ubbing. Daytoy a pananglaglagip ti agserbi koma a pakaibatayan ti agdama a panagsusupiat no ania klase a Kristiano dagiti Saksi ni Jehova.”