Babassit Ngem Naparabur
ANIA ngatat’ riknam a makisao kadagiti ganggannaet maipapan iti Pagarian ti Dios no agtayagka laeng iti 76 a sentimetro? Maibaga kenka ni Laura. Iti edad a 33, dayta ti katayagna, 76 a sentimetro laeng. Agnaedda ken ni adingna a María, nga agtawen iti 24 ken agtayag iti 86 a sentimetro, idiay Quito, Ecuador. Bay-antay ida a mangilawlawag kadagiti tubeng a masabetda iti Nakristianuan a ministerioda.
“Tapno makagtengkami iti pangasabaanmi ken kadagiti Nakristianuan a panaggigimong, magnakami iti agarup kagudua a kilometro tapno makalugankami iti bus. Manipud iti pagdissaaganmi, magnakami pay iti agarup kagudua a kilometro sakam aglugan manen iti bus. Makapaladingit ta adda lima a nauyong nga aso iti daytoy a dalan. Kabutengmi unay dagiti aso gapu ta para kadakami kasda la kadadakkel ti kabalio. Tapno adda pangbugawmi kadakuada no kasapulan, awit-awitmi ti maysa a pagbaut nga ilemmengmi iti asideg ti kalsada sakbay nga aglugankami iti bus tapno aramatenmi inton agawidkami.
“Dadakkel a talaga ti askawmi no sumagpatkam iti bus. Agbataykami iti maysa a bunton ti rugit iti pagurayan ti bus tapno nalaklaka ti lumugan. Isardeng ti dadduma a tsuper ti bus iti abay ti bunton, ngem saan a kastat’ aramiden ti dadduma. No kasta ti mapasamak, ti nataytayag kadakami tulonganna ti napampandek a sumagpat. Iti maikadua a paglugananmi, masapul nga agballasiwkami iti aduan lugan a highway—banag nga ikarigatanmi tangay ababa dagiti gurongmi. Gapu iti kapandekmi, problema pay ti nadagsen a bagmi. Tapno lumag-an ti bag, agusarkami iti maibulsa a Biblia ken limitaranmi met ti kaadu ti literatura nga awitenmi.
“Sipud pay kinaubingmi, agpadakami a napalalo a managputputong. Ammo dagiti kaarrubami a sigud a kaamakmi ti makisarita kadagiti ganggannaet. Gapuna, agsiddaaw ken apresiarenda ti pannakakitada kadakami nga agtuktok kadagiti ruanganda, ket kadawyan a dumngegda kadakami. Ngem kadagiti lugar a didakam unay am-ammo, masansan a ti laeng kinapandekmi ti makita dagiti tattao; gapuna, dida kanayon a seriosuen ti mensahemi. Uray pay kasta, mapakiredkami nga agtultuloy iti trabaho a panagebanghelio gapu ta mariknami ti ayat ni Jehova. Pabilgennakami met ti panangut-otubmi iti Proverbio 3:5, 6.”
Kas ipakita da Laura ken María, maidayaw ti Dios no adda kinapinget iti laksid dagiti tubeng gapu iti pisikal a kasasaad. Inkararag ni apostol Pablo a maikkat koma kenkuana ti “siit[na] iti lasag,” nalabit maysa a pisikal nga an-annayen. Ngem imbaga ti Dios kenkuana: “Umdasen kenka ti di kaikarian a kinamanangngaasik; ta ti pannakabalin[ko] mapagbalin a naan-anay iti kinakapuy.” Wen, saan a masapul a maikkat ti pisikal a depekto tapno makapagserbitayo iti Dios. Ti naan-anay a panagpannuray iti Dios ti makatulong kadatayo a mangipaay iti kasayaatan aniaman ti kasasaadtayo. Agsipud ta kastoy ti panangmatmat ni Pablo iti “siit[na] iti lasag,” mabalinna a kunaen: “Inton nakapuyak, iti kasta nabilegak.” (2 Corinto 12:7, 9, 10) Sumagmamano a tawen kalpasanna, insurat ni Pablo: “Ta kadagiti amin a bambanag addaanak iti bileg gapu iti daydiay mangted kaniak iti pannakabalin.”—Filipos 4:13.
Iti moderno a panawen, adda dakkel a trabaho nga ipatpatungpal ti Dios babaen kadagiti lallaki, babbai, ken ub-ubbing a naan-anay a dedikado kenkuana. Sumagmamano kadakuada ti addaan pisikal a depekto. Nupay mangnamnamada amin a maimbagan iti sidong ti Pagarian ti Dios, dida ur-urayen a pagpatinggaen pay ti Dios dagiti parikutda sakbay nga agserbida kenkuana.
Adda kadi met pisikal a depektoyo? Dikay maupay! Babaen ti pammatiyo, mabalin a maibilangkayo kadagidiay kas kada Pablo, Laura, ken María. Kas kadagiti matalek a lallaki ken babbai idi ugma, maikuna kadakuada ti kastoy: “Manipud iti nakapuy a kasasaad napabilegda.”—Hebreo 11:34.
[Ladawan iti panid 8]
María
Laura
[Ladawan iti panid 9]
Tultulongan ni María ni Laura a sumagpat iti bus
[Dagiti Ladawan iti panid 9]
“Kabutengmi unay dagiti aso gapu ta para kadakami kasda la kadadakkel ti kabalio”
Baba: Da Laura ken María ken dagidiay nangyadal iti Biblia kadakuada