Natay Gapu iti Prinsipio
LAGLAGIPENTAYO ni August Dickmann (nayanak idi 1910), maysa kadagiti Saksi ni Jehova.” Dagita ti umuna a sasao ti inskripsion iti plake (naipakita ditoy) a nabiit pay a naipabuya iti publiko iti dati a kampo konsentrasion idiay Sachsenhausen. Apay a maikari iti kasta a plake ti maysa kadagiti Saksi ni Jehova? Kastoy pay ti kuna ti inskripsion: “Pinaltogan dagiti SS iti publiko idi Setiembre 15, 1939, ta nagkedked maigapu iti pammatina.”
Naipupok ni August Dickmann iti kampo konsentrasion idiay Sachsenhausen idi 1937. Tallo nga aldaw kalpasan ti panagbettak ti Gubat Sangalubongan II idi 1939, nabilin a pirmaanna ti porma a mangipakita nga awatenna ti serbisio militar. Idi nagkedked, kinasarita ti komandante ti kampo ni Heinrich Himmler, panguluen ti SS (Schutzstaffel, ti nabileg a guardia ni Hitler) tapno dumawat iti pammalubos a patayenda ni Dickmann iti imatang ti amin a balud iti kampo. Idi Setiembre 17, 1939, inreport ti The New York Times manipud Alemania: “Ni August Dickmann, agtawen iti 29, . . . ket na-firing squad ditoy.” Kinuna ti pagiwarnak a ni Dickmann ti kaunaan nga Aleman a nagkedked a makipaset iti dayta a gubat gapu iti pammatina.
Innem a pulo a tawen kalpasanna, idi Setiembre 18, 1999, linaglagip ti Brandenburg Memorial Foundation ti pannakatay ni Dickmann, ket ti plake a pakalaglagipanna ita iriingna kadagiti bumisbisita ti kinatured ken nabileg a pammatina. Ti maikadua a plake iti makinruar a pader ti dati a kampo ipalagipna kadagiti bumisbisita a maysa laeng ni Dickmann kadagiti agarup 900 a Saksi ni Jehova a nagsagaba idiay Sachsenhausen gapu iti pammatida. Adu pay ti nagsagaba kadagiti dadduma a kampo. Wen, uray iti sidong dagiti nakas-ang a kasasaad kadagiti kampo konsentrasion, adu ti nangsalimetmet kadagiti nadiosan a prinsipio.
Kadagiti Saksi ni Jehova, rebbengen ti Kristiano a ‘paiturayan kadagiti nangatngato nga agtuturay [iti gobierno].’ (Roma 13:1) Nupay kasta, no piliten dagiti gobierno a salungasingenda dagiti linteg ti Dios, tuladenda ti inaramid dagiti apostol ni Kristo, a nagkuna: “Masapul nga agtulnogkami iti Dios kas agturay imbes a kadagiti tattao.” (Aramid 5:29) Kas resultana, iti sadinoman a lugar mannakikappia dagiti Saksi ni Jehova, kas ken August Dickmann, iti laksid dagiti nakaam-ames a kinaranggas maigapu kadagiti panagdadangadang dagiti tribu ken etniko a panaggiginnura iti lubong. Sursurotenda ti balakad ti Biblia: “Dika palubosan ti bagim a parmeken ti dakes, no di ket itultuloymo a parmeken ti dakes babaen ti naimbag.”—Roma 12:21.