Apay a Mamakawankayo?

“INYUSSUAT dagiti sientista ti maysa a panagsirarak a mangipamatmat a ti pammakawan pasayaatenna ti emosional​—ken mabalin nga uray ti pisikal​—a salun-at,” inreport ti The Toronto Star ti Canada. Nupay kasta, kuna ti propesor ti Stanford University idiay E.U.A. a ni Carl Thoresen, mangidadaulo a managsirarak iti Stanford Forgiveness Project, a “manmano la a tattao ti makaawat no ania ti pammakawan ken no kasano ti mangpakawan.”

Ti napudno a pammakawan ket maibilang a napateg nga aspeto ti Kinakristiano. Sigun iti report ti The Toronto Star, ti pammakawan kaipapananna nga “ammom a nasair ti riknam, ikkatem ti amin a pataudenna a gura, sa kaasiam ken ayatem pay ketdi ti tao a nakabasol kenka.” Naiduma daytoy iti panangpanuynoy, panangtagilag-an, pananglipat, wenno panangilibak iti nagkamalian; dina met kayat a sawen nga itulokmo lattan a mairurumenka. Kuna ti report a ti tulbek ti pudpudno a pammakawan isu ti “panangiwaksi iti gura ken sakit ti nakem.”

Kuna dagiti managsirarak a masapul ti ad-adu pay a panagsirarak maipapan kadagiti pisikal a pagimbagan ti panangpakawan. Nupay kasta, adda dagiti natakuatanda a pagimbaganna iti panunot, kas iti “di unay panagsikor, panagdanag ken panagleddaang.”

Ti nagsayaat a rason no apay a mamakawantayo ket masarakan iti Efeso 4:32, a kunana: “Agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa a kas met iti Dios sibubulos a pinakawannakayo babaen ken Kristo.” No maipapan iti panangpakawan, ken iti dadduma pay a banag, maidagadag a tuladentayo ti Dios.​—Efeso 5:1.

Madadael ti relasiontayo iti Dios no ditay pakawanen ti sabsabali idinto ta adda met ti rason a kaasiantay ida. Namnamaen ni Jehova nga agpipinnakawantayo. Iti kasta, mabalintay a dawaten ti pammakawanna.​—Mateo 6:14; Marcos 11:25; 1 Juan 4:11.