No ti Panagulimek Kaipapananna ti Panangkonsintir
TI LIBRO a Betrayal—German Churches and the Holocaust ibatadna ti papel ti relihion iti Nazismo. Kuna ti libro: “Gagangay idi ti panangsuporta dagiti Kristiano iti rehimen ket kaaduan ti di pulos nangkondenar iti pannakaidadanes dagiti Judio. Iti kastoy a situasion, adda kayat a sawen ti panagulimek.”
Ania ti nangallukoy kadagiti agkunkuna a Kristiano iti Nazismo? Ilawlawag ti libro nga adu ti napasurot ti “linteg-ken-urnos a propaganda [ni Hitler] iti kagimongan dagiti Aleman.” Kuna ti libro: “Kinondenarna ti pornograpia, prostitusion, aborsion, homoseksualidad, ken ti ‘kinaalas’ ti moderno nga arte, ken inikkanna kadagiti medalia a balitok, pirak, ken bronse dagiti inna nga addaan uppat, innem, ken walo nga annak, a nangparegta kadakuada nga agtultuloy iti nakaugalian nga akemda iti pagtaengan. Adu, uray ti kaaduan kadagiti Kristiano idiay Alemania, ti naatrakar iti National Socialism gapu iti kastoy a panangitandudo ni Hitler kadagiti nakaugalian a prinsipio, agraman ti namilitariaan a nasionalismo kas sungbatna iti pannakaibabain ti nasion iti Versailles Treaty.”
Adda maysa a grupo a naiduma unay ti takderna. Kuna ti Betrayal: “Nagkedked dagiti Saksi ni Jehova a makiraman iti kinaranggas wenno mangipakat iti puersa militar.” Kas resultana, sidadamsak a naidadanes daytoy a bassit a grupo, ket adu a miembrona ti naibalud kadagiti kampo konsentrasion. Ngem di latta nangrikna ti dadduma nga agkunkuna a pasurot ni Kristo. Kuna pay ti libro: “Kaaduan kadagiti Katoliko ken Protestante lalo a ginurada dagiti Saksi ni Jehova imbes a kaasianda ida, ken ad-adda a kinanunonganda dagiti naulpit a kababalin ni Hitler ngem iti natalna a kababalin dagiti Saksi.” Di pagduaduaan a ti panagulimekda pinakarona ti pannakaparigat dagiti Saksi iti sidong ti rehimen a Nazi.
Nupay agtultuloy ti nabara a panagdedebate maipapan iti pannakiraman dagiti iglesia iti politika ti Nazi, inawagan ti Betrayal dagiti Saksi a “maysa a relihioso a grupo a di kimmanunong wenno nakinamin iti rehimen.”