Nakristianuan nga Ayat—Saan Laeng nga iti Sao
IDI nauram ti balay ti pamilia Bartholomew idiay Trinidad, awan a pulos ti naisalbarda malaksid iti biagda. Maysa a kabagian nga adda iti asideg ti nangpadagus kadakuada, ngem saan a nagpatingga dita ti estoria.
Maysa kadagiti Saksi ni Jehova ni Olive Bartholomew, ket dagiti kakongregasionna—agraman dagiti naggapu kadagiti kabangibang a lugar—timmulongda a nangipatakder manen iti nauram a balay ti pamiliada. Nabuangay ti maysa a komite a mangimaton iti proyekto a panagbangon, ket nairugi ti konstruksion. Adda sadiay ti agarup 20 a Saksi, agraman ti sumagmamano a kaarruba. Timmulong uray dagiti agtutubo, sa adda dagidiay immay nagpamerienda.
“Nasdaaw unay ti pamiliak,” kinuna ni Olive, kas impadamag ti Sunday Guardian ti Trinidad. “Saanda a Saksi, ket agsidsiddaaw pay la ni lakayko iti maim-imatanganna.”
Iti panangsumariona iti trabaho, inyunay-unay ti nangidaulo iti konstruksion a dagiti kasta nga aramid ket di mailibak a pakabigbigan ti pudno a Kristianidad. “Saankami laeng a mamalaybalay a mangisarsarita iti maipapan iti ayat,” kinunana. “Ikagkagumaanmi nga aramiden ti ikaskasabami.”—Juan 13:34, 35.
[Ladawan iti panid 32]
Ni Olive Bartholomew ken ti asawana