Ti Daga Pakasubokan Laeng a Lugar?
ANIAN a pannakabang-ar! Kalpasan ti dua a lawas a nainget a panageksamen ti estudiante, maragsakan idi naammuanna a nakapasa iti eksamen. Makastreken iti nabayag a tartarigagayanna a trabaho.
Kasta ti panangmatmat ti adu a tattao maipapan iti biag ditoy daga. Ipapanda a maysa a pangrugian a pannubok daytoy a rumbeng a malasatan ti amin. Matagiragsak dagidiay “makapasa” ti nasaysayaat a Sumuno a Biag. Nakalkaldaang ngarud no ti agdama a biag—a basta panagbiag laeng para iti adu—ti kasayaatan a manamnama ti tattao. Nupay nasalun-at ken nasaliwanwan ti nganngani intero a panagbiag ni Job, kastoy ti napaliiwna: “Ti tao, a mayanak iti babai, ababa dagiti aldawna, ken napno iti riribuk.”—Job 14:1.
Kas iti panangmatmat ti adu, kuna ti New Catholic Encyclopedia: “Ti pannakaipadayag idiay langit ti panggep ti Dios para iti tao. . . . Naragsakto ti tao inton magun-odna ti nailangitan a biag.” Sigun iti nabiit pay a surbey ti Church of Christ idiay Estados Unidos, 87 a porsiento kadagiti napagsaludsodan ti mamati a mapanda kano idiay langit inton matayda.
Adu met a saan a Kristiano ti mangnamnama a mapanda iti nasaysayaat a lugar kalpasan ti ipapatayda ditoy daga. Kas pagarigan, namnamaen dagiti Muslim a mapanda iti nailangitan a paraiso. Dagiti pasurot ti sekta ti Nasin-aw a Daga ti Budismo idiay China ken Japan patienda a no di agsarday nga itanamitimda ti “Amitabha,” ti nagan ti Buddha ti Di-Nakedngan a Lawag, mayanakdanto manen iti Nasin-aw a Daga, wenno Makinlaud a Paraiso, a sadiay agbiagda iti naan-anay a kinaragsak.
Makapainteres ta ti Biblia, ti kasaknapan ti pannakaipatarus ken pannakaiwarasna a nasantuan a libro iti lubong, dina isursuro a maysa laeng a pagrubbuatan ti daga nga agturong iti sabali a lugar. Kas pagarigan, kunana: “Ti sililinteg tawidennanto ti daga, ket agtaengto kenkuana nga agnanayon.” (Salmo 37:29) Masarakan met iti Biblia ti nalatak a sasao ni Jesus: “Nagasat dagiti naemma: ta tawidendanto ti daga.”—Mateo 5:5, King James Version.
Ti pammati ti kaaduan a temporario laeng ti biagtayo ditoy daga iparipiripna a ti ipapatay ket isu ti ruangan nga agturong iti naragsak a sumuno a biag. No pudno dayta, makuna ngarud a bendision ti ipapatay. Ngem kasta kadi ti panangmatmat ti tattao maipapan iti ipapatay, wenno ikagumaanda ketdi a paatiddogen ti biag? Ipakita dagiti kapadasan a di kayat dagiti tattao ti matay no nasalun-at ken natalgedda.
Nupay kasta, gapu ta ti biag ditoy daga ket napno iti kinadakes ken panagsagaba, idiay langit latta ti patien ti adu a tattao kas kakaisuna a lugar a pakasarakan iti pudpudno a talna ken ragsak. Ti langit kadi ket basta lugar laeng ti talna ken ragsak, nga awan a pulos ti kinadakes ken riribuk? Idiay laeng kadi langit a mapasaran ti Sumuno a Biag? Mabalin a maklaatkayo kadagiti sungbat ti Biblia. Pangngaasiyo ta ituloyyo ti agbasa.