Adda Kadi Biag Kalpasan ti Ipapatay?
“NO TI nabaneg a lalaki matay mabalinna kadi ti agbiag manen?” insaludsod ni patriarka a Job agarup 3,500 a tawen ti napalabasen. (Job 14:14) Daytoy a saludsod ket binuriborna ti sangatauan iti rinibun a tawen. Kadagiti naglabas a panawen, dagiti tattao iti tunggal kultura inut-utobda daytoy a topiko ket nakapataudda iti nadumaduma a teoria.
Adu nga agkunkuna a Kristiano ti mamati iti langit ken impierno. Iti sabali a bangir, mamati dagiti Hindu iti reinkarnasion. Idi nagkomento maipapan iti panangmatmat dagiti Muslim, kinuna ni Emir Muawiyah, maysa a katulongan iti narelihiosuan a sentro ti Islam: “Mamatikami nga addanto aldaw a panangukom kalpasan ti ipapatay, inton mapanka iti saklang ti Dios a ni Allah, a kaslanto iti pannagna a mapan iti husgado.” Kalpasanna, sigun iti pammati nga Islam, usigento ni Allah ti kabibiag ti tunggal tao ket itudingna iti paraiso wenno iti impierno.
Idiay Sri Lanka, agpadpada a dagiti Budista ken dagiti Katoliko bay-anda a nakalukat dagiti ridaw ken tawada no adda matay a kabbalayda. Maysa a lampara ti mapasgedan, sa maiplastar ti lungon a naipaturong dagiti saka ti natay iti makinsango a ruangan. Patienda a dagitoy ti mangpalaka iti iruruar ti espiritu ti pimmusay.
Sigun ken ni Ronald M. Berndt iti University of Western Australia, patien dagiti Aborigine idiay Australia nga “adda espiritu a paset dagiti tattao a saan a madadael.” Adda dagiti tribu idiay Africa a mamati a kalpasan ti ipapatay, dagiti ordinario a tattao agbalinda nga al-alia, idinto ta dagiti prominente nga indibidual agbalinda nga espiritu dagiti inapo a mapadayawan ken pagdawatan kas di makita a papanguluen ti komunidad.
Kadagiti dadduma a pagilian, dagiti pammati maipapan iti kasasaad dagiti natay ket kombinasion ti lokal a tradision ken ti makunkuna a Kristianidad. Kas pagarigan, kadagiti adu a Katoliko ken Protestante idiay Makinlaud nga Africa, nakayugalianda nga abbongan dagiti sarming no adda matay di la ket ta makitada ti espiritu ti natay.
Talaga a nagduduma ti sungbat dagiti tattao iti saludsod nga, ‘Ania ti mapasamak kadatayo no mataytayo?’ Nupay kasta, ti maysa a kangrunaan nga ideya ket: Adda banag iti uneg ti tao nga imortal ken agtultuloy nga agbiag kalpasan ti ipapatay. Patien ti dadduma a tattao a dayta a “banag” ket maysa nga espiritu. Kas pagarigan, kadagiti paset ti Africa ken Asia ken iti intero a Pasipiko a rehion ti Polynesia, Melanesia, ken Micronesia, adu ti mamati a ti espiritu—saan a kararua—ti imortal. Kinapudnona, awan pay ketdi ti sao a “kararua” iti dadduma a lenguahe.
Adda kadi espiritu iti sibibiag a tao? Pudno kadi a dayta nga espiritu panawanna ti bagi no matay? No kasta, ania ti mapasamak iti espiritu? Ket ania ti namnama dagiti natay? Rumbeng nga utoben a siaannad dagitoy a saludsod. Aniaman ti kultura wenno relihionyo, maipasangotay amin iti ipapatay. Gapuna, personal nga apektarandakay unay dagita nga isyu. Paregtaendakayo a mangusig iti daytoy a banag.