“Rimmayray ti Panagayatmi”
KALPASAN ti 23 a tawen a kinaulimek, bimtak ti Mount Usu idiay Hokkaido, Japan idi Biernes, Marso 31, 2000. Rinibu nga umili ti napilitan a pumanaw manipud iti napeggad a disso. Adu ti napukawan iti pagtaengan ken trabaho, ngem awan kadakuada ti natay. Pakaibilangan dagiti napilitan a pimmanaw ket dagiti 46 a Saksi ni Jehova, ngem saanda a nabaybay-an.
Iti mismo nga aldaw ti panagbettak, nayurnos ti pannaranay babaen ti tulong ti agdaldaliasat a Kristiano a ministro nga agserserbi iti dayta a lugar. Di nagbayag, nangrugi a sumangpet dagiti pangsaranay nga abasto manipud kadagiti kabangibang a kongregasion. Iti panangiwanwan ti sanga nga opisina ti Japan, dagus a nabuangay ti maysa a komite a tumulong, ket simmangpet ti nagadu a donasion dagiti Saksi ni Jehova manipud iti amin a lugar idiay Japan. Tapno masuportaran dagiti naespirituan nga aktibidad, adda dagiti amin-tiempo a ministro dagiti Saksi ni Jehova a naibaon kadagiti kangrunaan a naapektaran a kongregasion, ken kanayon a binisita ti manangaywan sirkito ti lugar tapno mangipaay iti emosional ken naespirituan a tulong.
Dagiti Saksi iti naapektaran a lugar intultuloyda nga inangay dagiti Nakristianuan a gimong bayat dayta narigat a tiempo babaen ti panangusarda kadagiti pribado a pagtaengan iti nataltalged a lugar. Idi maipalubosen ti panagsubli iti lugar a pakasarakan iti Kingdom Hall, nasangpetan dagiti kakabsat a bimmangkirig, nagbirri, ken nadadael ti pasdek. Agipugpugso pay laeng iti napuskol nga asuk ti baro nga abut ti bantay iti saan nga adayo iti Kingdom Hall. Pinampanunot dagiti Saksi, ‘Nainsiriban kadi ti agtultuloy a panaggigimong iti daytoy a lugar? Matarimaan pay kadi ti Kingdom Hall?’
Naikeddeng a maibangon ti maysa a baro a Kingdom Hall iti nataltalged a lugar iti asideg. Timmulong ti Regional Building Committee. Nausar a pagibangon dagiti kuarta nga indonar dagiti Saksi iti intero a pagilian. Adda daga a nagatang a dagus, ket iti tulong dagiti ginasut a boluntario, naibangon ti maysa a baro a Kingdom Hall iti ababa a tiempo. Idi Domingo, Hulio 23, 2000, adda 75 a timmabuno iti umuna a gimong a naangay iti dayta a kaibangbangon a Kingdom Hall. Adu a timmabuno ti nakalua gapu iti rag-oda. Idi naidedikar ti Kingdom Hall idi Oktubre iti isu met laeng a tawen, maysa kadagiti panglakayen ti lokal a kongregasion ti natignay a nangikuna: “Nangyeg iti rigat ken panagsagaba ti panagbettak ti bulkan. Ngem daytoy a pasdek ti namagbalin a rag-o iti butengmi. Rimmayray ti panagayatmi ken Jehova ken kadagiti patgenmi a Kristiano a kakabsat!”
[Picture Credit Line iti panid 19]
Panagbettak ti Mount Usu: AP Photo/Koji Sasahara