Nakasursuro Uray Baketen
NAYANAK ni Kseniya idi 1897. Tallo a babbai ken maysa a lalaki ti annakna, 15 nga apoko, ken 25 nga apoko iti tumeng. Sipud kinaubingna, inaramidna ti insuro dagiti nagannak kenkuana. Nupay nagturong idiay Moscow kas maysa a nagbakuit manipud iti aggugubat a Republika ti Abkhaz, a masarakan iti nagbaetan ti Nangisit a Baybay ken ti Caucasus, mapnek ni Kseniya iti biagna, nangruna iti aw-awaganna a tinawidna a pammati.
Idi 1993, nagbalin a Saksi ni Jehova ni Meri, ti anak a babai ni Kseniya. Rinugian ni Meri nga ipakaammo ken ni Kseniya ti maipapan ken ni Jehova a Dios ken ti Biblia, ngem dina kayat ti dumngeg. Kanayon nga ibaga ni Kseniya iti anakna, “Baketak unayen tapno makasursuro iti baro a banag.”
Ngem ti anakna a ni Meri; ti asawa ti apokona a lalaki, ni Londa; ken dagiti apokona iti tumeng a da Nana ken Zaza, a nagbalin amin a Saksi ni Jehova, intultuloyda ti nangisarita kenkuana ti maipapan iti Biblia. Maysa a rabii idi 1999, imbasada ken ni Kseniya ti maysa a teksto a nangtukay iti pusona. Naglaon daytoy iti makagutugot a sasao ni Jesus kadagiti matalek nga apostolna idi inyussuatna ti Pangrabii ti Apo. (Lucas 22:19, 20) Iti tawenna a 102, inkeddeng ni Kseniya iti dayta a rabii nga irugina ti agadal iti Biblia.
“Kalpasan ti 102 a tawen a panagbiagko, naawatak met laengen ti kaipapanan ti biag,” kuna ni Kseniya. “Naamirisko nga awan ti napatpateg ngem ti agserbi iti nakaskasdaaw, naayat a Dios, ni Jehova. Alertoak ken nasalun-atak pay laeng. Makabasaak uray awan ti antiparak ken siaaktibo a makilanglangenak iti pamiliak.”
Idi Nobiembre 5, 2000, nabautisaran ni Kseniya. Kinunana: “Ita, itedko ti biagko ken Jehova tapno naimpusuan nga agserbiak kenkuana. Mangipaimaak iti magasin ken tract bayat ti panagtugawko iti pagsardengan ti bus nga asideg iti pagtaengak. Masansan a sumarungkar dagiti kabagian, ket siraragsak nga iranudko kadakuada ti kinapudno maipapan ken Jehova.”
Il-iliwen ni Kseniya ti tiempo inton ti ‘lasagna agbalin a nasalsalibukag ngem iti kinaagtutubo, ket agsubli kadagiti aldaw ti kired ti kinaagtutubona.’ (Job 33:25) No ti agtawen iti 100 ket dina marikna a baket unayen tapno maadalna ti kaipapanan ti biag a dinakamat ti Biblia, dakayo ngay?