No Kaano a Nainsiriban ti Pumanaw

ITI agdama a lubong, adu ti agintutured, mannakiapa, wenno pakaipasanguan a sulisog. Ti tao a mangpanaw iti maysa a situasion ket kaaduanna a mamatmatan a nakapuy wenno takrot. Mabalin a laisenda pay ketdi.

Nupay kasta, ibatad ti Biblia nga adda dagiti gundaway a nainsiriban ken kinatured ti pumanaw. Kas panangpasingked iti dayta, sakbay ti panangibaonna kadagiti adalanna a mapan mangasaba, kinuna ni Jesu-Kristo kadakuada: “Inton idadanesdakayo iti maysa a siudad, pumanawkayo nga agturong iti sabali.” (Mateo 10:23) Wen, ikagumaan idi dagiti adalan ni Jesus nga adaywan dagiti manangidadanes kadakuada. Saanda a mangisayangkat iti aniaman a kas iti krusada, a puersaenda a kombertien ti sabsabali. Mensahe ti talna ti awitda. (Mateo 10:11-14; Aramid 10:34-37) Isu nga imbes nga agpungtot, pumanaw dagiti Kristiano, umadayoda manipud kadagiti manangriribuk. Iti kasta a pamay-an, mataginayonda ti nasayaat a konsiensia kasta met ti nagpateg a relasionda ken ni Jehova.​—2 Corinto 4:1, 2.

Ti maysa a naigidiat a pagarigan ket masarakan iti libro ti Biblia a Proverbio. Dakamatenna ti maysa nga agtutubo a lalaki nga, imbes nga adaywanna ti pannulisog, napan iti maysa a balangkantis a “kas iti toro nga agturong iti mismo a pannakaparti.” Ti resulta? Napasaranna ti didigra gapu ta timmulok iti sulisog.​—Proverbio 7:5-8, 21-23.

Kasano no masulisogkayo nga agaramid iti seksual nga imoralidad wenno maipasango iti sabali a peggad? Sigun iti Sao ti Dios, nasaysayaat ti pumanaw, ti dagus nga iyaadayo iti eksena.​—Proverbio 4:14, 15; 1 Corinto 6:18; 2 Timoteo 2:22.