Matarusanyo Kadi ti Ayat ti Dios?

NAMINSAN, dineskribir ni Job ti kasasaad ti imperpekto a tao babaen kadagitoy a sasao: “Ti tao, a nayanak manipud babai, ababa ti biagna ken namelmelan iti pannakariribuk. Kas iti sabong isu rimmuar ket makeltay, ket agtalaw a kas iti anniniwan ket saan nga agtalinaed.” (Job 14:1, 2) Ti biag, kas napasaran ni Job, ket napno iti tuok ken ladingit. Napadasanyon kadi ti kasta?

Ngem iti laksid dagiti pakarigatan ken parikut a mabalin a mapasarantayo, adda natalged a namnama, a naibasar iti asi ken ayat ti Dios. Umuna iti amin, nangipaay ti naasi a nailangitan nga Amatayo iti daton a pangsubbot iti sangatauan manipud iti namulitan, sibabasol a kasasaadda. Kinuna ni Jesu-Kristo sigun iti Juan 3:16, 17: “Ta ti Dios inayatna ti lubong [ti sangatauan] iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag. Ta ti Dios imbaonna ti Anakna [ni Jesus] iti lubong, saan a tapno ukomenna ti lubong, no di ket tapno ti lubong maisalakan babaen kenkuana.”

Utobenyo met ti naasi a panangtrato ti Dios kadatayo nga imperpekto a tattao. Kinuna ni apostol Pablo: “Manipud iti maysa a tao inaramidna ti tunggal nasion dagiti tattao, tapno agnaedda iti intero a rabaw ti daga, ket inkeddengna dagiti naituding a tiempo ken dagiti naipasdek a pagpatinggaan ti pagnaedan dagiti tattao, tapno sapulenda ti Dios, no isu maarikapda ket pudno a masarakanda, nupay, iti kinapudnona, saan nga adayo iti tunggal maysa kadatayo.” (Aramid 17:26, 27) Agasenyo! Nupay imperpektotayo a tattao, mabalintayo latta a tagiragsaken ti personal a relasion iti naayat a Namarsua kadatayo, ni Jehova a Dios.

Makapagtalektayo ngarud iti masanguanan, nga ammotayo nga aywanannatayo ti Dios ken siaayat a nangaramid iti probision nga agpaay iti manayon a pagimbagantayo. (1 Pedro 5:7; 2 Pedro 3:13) Aduantayo ngarud iti rason a mangammo iti ad-adu pay maipapan iti naayat a Diostayo babaen ti panangadal iti Saona, ti Biblia.