‘Sibubulos nga Agpipinnakawankayo iti Maysa ken Maysa’
MAMATIKAYO kadi a pinakawan ti Dios dagiti basolyo? Idiay Estados Unidos, agparang a mamati ti kaaduan a nataengan. Ni Dr. Loren Toussaint, kangrunaan nga autor ti panagadal a naaramid iti University of Michigan Institute for Social Research, impadamagna a kadagiti 1,423 nga Amerikano a napagsaludsodan, agarup 80 porsiento kadagiti nataengan nga agtawen iti nasurok 45 ti nangibaga a pinakawan ti Dios dagiti basolda.
Ngem nakakadkadlaw ta 57 porsiento laeng kadagiti napagsaludsodan ti nangibaga a pinakawanda ti sabsabali. Dayta nga estadistika ipalagipna kadatayo ti sasao ni Jesus iti Sermonna iti Bantay: “Ta no pakawanenyo dagiti tattao kadagiti labsingda, pakawanennakayto met ti nailangitan nga Amayo; idinto ta no saanyo a pakawanen dagiti tattao kadagiti labsingda, uray ni Amayo saannanto a pakawanen dagiti labsingyo.” (Mateo 6:14, 15) Wen, ti panangpakawan ti Dios kadagiti basoltayo ket adda kondisionna, a pakairamanan ti sisasagana a panangpakawantayo iti sabsabali.
Ni apostol Pablo pinalagipanna dagiti Kristiano idiay Colosas maipapan iti daytoy a prinsipio. Indagadagna kadakuada: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo.” (Colosas 3:13) Pudno, saan a kanayon a nalaka nga aramiden daytoy. Kas pagarigan, no awan gapgapuna wenno awan asi a pagsasawandatayo, mabalin a narigat ti mangpakawan.
Nupay kasta, adu latta ti pagimbagan ti panangpakawan. Ni Dr. David R. Williams, maysa a sosiologo, ti nagkuna maipapan iti panagsirarakna: “Naduktalanmi nga adda partikular a pakainaigan ti panangpakawan iti sabsabali ken ti salun-at ti panunot kadagiti medio nataengan ken kadagiti nataenganen nga Amerikano.” Maitunos dayta iti sasao ni masirib nga Ari Solomon, a nagsurat agarup 3,000 a tawen ti napalabasen: “Ti natalinaay a puso isu ti biag ti nainlasagan a bagi.” (Proverbio 14:30) Yantangay ti panagbalin a manangpakawan itandudona ti nasayaat a relasion iti Dios ken iti kaarrubatayo, rasonable a matignaytayo a sibubulos a mangpakawan iti maysa ken maysa manipud puso.—Mateo 18:35.