“Ti Tallo nga Ari”​—Siasinoda?

Kada Krismas, masansan a maimatangan dagiti eksena ti tallo a nakaroba a lallaki a nakakamelio, a dimtengda iti kuadra nga ayan ni Jesus a maladaga a nakaidda iti kulluong. Dagiti nalabor ti kawesda a bisita ket masansan a maawagan kas ti tallo nga ari. Ania ti ibaga ti Biblia maipapan kadakuada?

Sigun iti Biblia, dagiti makunkuna a tallo nga ari ket naggapu iti “makindaya a paspaset,” ket sadiay a naammuanda ti pannakayanak ni Jesus. (Mateo 2:1, 2, 9) Napaut ti panagdaliasat dagitoy a lallaki nga agturong iti Judea. Idi nakitada ni Jesus, saanen a maysa a kappasngay a nakaidda iti kulluong. Imbes ketdi, nasarakanda ni Maria ken “ti ubing” nga agnanaed iti maysa a balay.​—Mateo 2:11.

Inawagan ti Biblia dagitoy a lallaki kas mago, wenno “astrologo,” ken dina imbaga no manoda. Kuna ti The Oxford Companion to the Bible: “Ti koneksion ti mahika ken astrolohia ket nayanninaw iti panaginteres dagiti bisita iti bituen a nangiturong kadakuada idiay Betlehem.” Nalawag a kondenaren ti Biblia ti amin a kita ti mahika ken ti aramid dagiti taga Babilonia a pananggun-od iti impormasion babaen dagiti bituen.​—Deuteronomio 18:10-12; Isaias 47:13.

Awan ti aniaman a nagimbaganna ti impormasion a nayallatiw kadagitoy a lallaki. Nakapungtot ni Ari Herodes gapu iti imonna. Dayta ti makagapu a nagtalaw da Jose, Maria, ken Jesus idiay Egipto ken ti pannakapapatay ti amin nga ubbing a lallaki idiay Betlehem “manipud dua ti tawenna ken agpababa.” Siaannad a pinattapatta ni Herodes ti tiempo ti pannakayanak ni Jesus manipud iti impormasion a naammuanna kadagiti astrologo. (Mateo 2:16) Gapu kadagiti parikut a pinataud ti panagbisitada, rasonable a kunaentayo a ti bituen a nakitada ken ti mensahe maipapan iti “daydiay nayanak nga ari dagiti Judio” ket naggapu iti kabusor ti Dios, ni Satanas a Diablo, ta kayatna a papatayen ni Jesus.​—Mateo 2:1, 2.