Nasupapakan ti Panagan-anusna

Adu a nasayaat panagpuspusoda a tattao ti agtarigagay a maammuan koma dagiti ipatpategda ti maipapan kadagiti panggep ti Dios ket iti kasta agbalin a naragsak ti biagda. No idedikar ti maysa a tao ti biagna iti Dios, mabalin a natulongan dagiti dadduma, agtutubo man wenno nataengan, a mangaramid iti kasta a nainsiriban a pangngeddeng gapu iti nasayaat a konduktada. Pudno dayta iti kaso ni Jearim, maysa a balasitang a taga Mexico. Kastoy ti pinaisalaysayna iti maysa nga espesial nga asamblea dagiti Saksi ni Jehova:

“Kayatko nga iranud kadakayo ti rag-o ken ragsakko. Ngamin, sangapulo ket walo a tawenen ti napalabas, idi saanak pay a naipasngay, naammuan dagiti dadakkelko ti kinapudno. Rimmang-ay ni nanangko, ken kasta met kadakami ken adingko idi agangay. Inkarkararagmi ken Jehova a surotento met koma ni tatangmi ti dalan nga agturong iti biag. Sangapulo ket walo a tawenen ti naglabas, ket naisangsangayan nga aldaw daytoy kadakami. Agpabautisaren ni Tatang. Agyamanak ken Jehova ta dimtengen daytoy nabayag nga inur-uraymi a kanito sakbay ti panangyegna iti panungpalan. Agyamanak, Jehova!”

Iti panaglabas dagiti tawen, awan duadua a sipapanunot ti pamilia daytoy a balasitang kadagiti prinsipio a masarakan iti naipaltiing a balakad ti 1 Pedro 3:1, 2, a kunana: “Dakayo nga assawa a babbai, agpasakupkayo kadagiti bukodyo nga assawa, tapno iti kasta, no ti asinoman saan a natulnog iti sao, mabalin a magun-od ida nga awan ti sao babaen iti kababalin dagiti assawada a babbai, agsipud ta nasaksianda ti nadalus a kababalinyo agraman ti nauneg a panagraem.” Ken nalawag a tinungpal ni agtutubo a Jearim ti kuna ti Deuteronomio 5:16: “Dayawem ni amam ken ni inam, kas iti imbilin kenka ni Jehova a Diosmo.” Pudno a naparaburan ni Jearim ken ti pamiliada gapu iti panangyaplikarda kadagita a prinsipio ken siaanus a panangnamnamada ken Jehova.