“Diak Am-ammo Unay ti Dios”

“ITI naglabas a tawen, sinarsarungkarandak dagiti Saksi ni Jehova ken inranudda dagiti naisangsangayan a damag maipapan iti Pagarian ti Dios. Walo a tawen a maysaak a Katoliko, ngem diak am-ammo unay ti Dios. Iti dayta makatawen laeng, adun ti naadalko,” insurat ti maysa a lalaki nga agnanaed idiay Kerala, India. “Maragsakanak unay a makaammo a maipabpablaak Ti Pagwanawanan iti 139 [146 ita] a lenguahe,” intuloyna. “Nakaskasdaaw a ti mensahe maipapan iti Dios ket maam-ammuan dagiti tattao iti amin a pagsasao.”

Nupay ibaga ti adu a pilosopo nga imposible a maam-ammo ti Dios, imbatad ni apostol Pablo a posible dayta. Idi kasasaona ti maysa a grupo dagiti taga Atenas, a dadduma ti agdaydayaw iti altar a naidedikar iti “Dios a Di Am-ammo,” kinuna ni Pablo: “Ti saanyo nga ammo a pangipapaayanyo ti nadiosan a debosion, isu daytoy ti ibunannagko kadakayo. Ti Dios a nangaramid iti lubong ken amin a bambanag nga adda iti dayta . . . mangted iti biag ken anges ken amin a bambanag iti amin a tattao. Ket manipud iti maysa a tao inaramidna ti tunggal nasion dagiti tattao, tapno agnaedda iti intero a rabaw ti daga.”​—Aramid 17:23-26.

Indagadag ni Pablo kadagiti agdengdengngeg kenkuana nga ikagumaanda nga am-ammuen ti Namarsua, agsipud ta “saan nga adayo iti tunggal maysa kadatayo.” (Aramid 17:27) Maragsakan dagiti Saksi ni Jehova a tumulong kadakayo a mangam-ammo iti pudno a Dios ken dagiti makaay-ayo a galadna.