Sibabara nga Awisendakayo

TI Maudi a Pangrabii, nga inyussuat ni Apo Jesu-Kristo agarup 2,000 a tawenen ti napalabas, ket saan laeng a makapainteres a pasamak iti historia. Adda napateg nga epektona kadagiti tattao sipud idi mayussuat dayta. Gapu ta natignayda iti nabasada iti salaysay ti Ebanghelio maipapan iti pagteng iti dayta a rabii, adu ti nangikagumaan a manglagip iti Pangrabii ti Apo iti nadumaduma a pamay-an.

Saan a pagsiddaawan ti panaginteres iti dayta, yantangay ni Jesu-Kristo a mismo binilinna dagiti adalanna a rambakanda dayta nga okasion ken regular nga aramidenda dayta. Espesipiko a kinunana kadakuada: “Itultuloyyo nga aramiden daytoy kas panglaglagip kaniak.”​—Lucas 22:19; 1 Corinto 11:23-25.

Siempre, tapno talaga a makagunggona a kapadasan ti pananglaglagip, masapul nga umiso ti pannakaawat ti maysa iti kaipapananna, kas masarakan iti Sao ti Dios, ti Biblia. Kanayonanna, napateg a maammuan no ania ti ibaga ti Biblia maipapan iti no kaano ken kasano a marambakan ti okasion.

Kas panagtulnog iti bilin ni Jesus, agtataripnong dagiti Saksi ni Jehova iti sangalubongan inton rabii ti Mierkoles, Abril 16, 2003, tapno lagipenda ti ipapatay ni Jesus. Iti dayta nga okasion, usigenda ti Kasuratan ken parayrayenda ti pammati ken ayatda ken ni Apo Jesu-Kristo, a nagkuna: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Sibabara nga awisendakayo a makitaripnong kadakuada iti dayta a rabii tapno maparayray met ti pammati ken ayatyo ken ni Jesu-Kristo ken iti nailangitan nga Ama, ni Jehova a Dios.