Pilienyo ti Biag nga Agnanayon

TA pay la a kastoy kaadu ti pagpilian ti adu a tao. Kas pagarigan, masansan nga agpilitayo no ania ti ikawes, kanen, ken no sadino ti pagtrabahuan ken pagnaedantayo. Iti adu a paset ti lubong, gagangay a kostumbre ti panagpili iti kapareha. Ngem mangitukon ti Biblia iti pagpilian a mangrimbaw kadagiti amin a sabali a pagpilian​—maysa a silulukat iti amin a sangatauan.

Kuna ti Biblia: “Daydiay sititibker a mangitaktakder iti kinalinteg nailinia maipaay iti biag, ngem daydiay mangkamkamat iti dakes nailinia maipaay iti bukodna nga ipapatay.” (Proverbio 11:19) Kinuna met ni Jesu-Kristo: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Wen, linuktan kadatayo ti Namarsua ti gundaway a mangpili iti kurso a mangiturong iti agnanayon a biag! Ania ti masapul nga aramidentayo tapno magun-odtayo ti biag nga agnanayon?

Sigun iti Biblia, “iti dana ti kinalinteg adda biag.” (Proverbio 12:28) Mabalintayo ti maibilang kadagiti nalinteg nga adda iti dana ti biag nga agnanayon. Kasano? Babaen ti panangsigurado a maitunos ti panagbiagtayo iti pagayatan ken bilbilin ti Dios. (Mateo 7:13, 14) Gapuna, mangaramidtayo koma iti umiso a panagpili ket awatentayo ti sagut ti Dios a biag nga agnanayon.​—Roma 6:23.