“Nagtuktok ti Dua a Tao iti Ridawmi”

“DUA a tawenen ti napalabas sipud daydi nakaladladingit nga ipupusay ti anakmi.” Dayta ti rugi ti naipablaak a surat iti periodiko a Le Progrès, idiay Saint-Étienne, Francia.

“Tallo la a bulan ni Mélissa idi nagsagaba iti nakaro a sakit a trisomy 18. Makapaladingit unay ta awan pulos ti naan-anay a panagimbag manipud iti kasta a sakit. Nupay napadakkelkami a kas Katoliko, sangkasaludsodmi ‘Dios, no addaka, apay nga impalubosmo a mapasamak dagitoy a banag?’” Nalawag a nakarikna iti saem ken kinaawan gaway ti ina a nagsurat. Intuloy ti suratna:

“Di nagbayag kalpasan dagitoy a pasamak, nagtuktok ti dua a tao iti ridawmi. Dagus a nalasinko ida kas Saksi ni Jehova. Inkeddengko a siraraem a liklikan ida, ngem nakitak nga adda broshur nga ituktukonda. Maipapan dayta iti rason no apay nga ipalpalubos ti Dios ti panagsagaba. Isu nga inkeddengko a paunegen ida tapno paneknekak a biddutda. Imbagak a no maipapan iti panagsagaba, talaga a nakaro ti napasaran ti pamiliak ken maulit-ulit a naibaga kadakami ti sasao a kas iti ‘Ti Dios intedna kadakami ti anakmi, ket ti Dios innalana met laeng ti anakmi.’ Nagpaut iti nasurok a maysa nga oras ti pannakisarita dagiti Saksi. Dimngegda kaniak buyogen ti kasta unay a pannakipagrikna, ket idi pumanawda, simmayaat ti panagriknak isu nga immannugotak a bisitaendakto manen. Dua a tawenen ti napalabas sipud idi. Saanak a nagbalin a maysa kadagiti Saksi ni Jehova, ngem inrugik ti nakipagadal iti Biblia kadakuada, ken ikagkagumaak a tabunuan dagiti gimongda.”