Ti Pudno a Panagdayaw Pagkaykaysaenna ti Pamilia

AGTAWEN iti 13 ni Maria idi nangngegda ken ni adingna a Lucy ti maipapan ken ni Jehova nga insarsarita ti kabagianda. Inlawlawagna pay ti namnama maipapan iti Paraiso a daga. Gapu ta kayatda ti makasursuro pay, simmurotda ken ulitegda a napan iti Kingdom Hall dagiti Saksi ni Jehova. Naay-ayo ni Maria gapu ta nasayaat ti pannakailawlawag dagiti sursuro sadiay. Nagpaiduma unay dayta iti simbaan gapu ta agkankanta laeng ti kaaduan nga ar-aramidenda! Di nagbayag, maysa a Saksi ti nangyadal iti Biblia kada Maria ken Lucy.

Mamati iti pilosopia ken ebolusion ti manongda a ni Hugo. Imbilangna ti bagina kas ateista. Ngem bayat nga agserserbi iti militar, nabasana ti libro a Life​—How Did It Get Here? By Evolution or by Creation? a Nasungbatan dagiti saludsodna a di nasungbatan dagiti sabali a relihion. Idi nagturposen ti panagserbina iti militar, inrugina ti nagadal iti Biblia ken nakigimong a kadua dagiti kakabsatna tapno umuneg ti pammatina iti Dios a kabbaro a natakuatanna. Nagbautisar da Maria ken Lucy idi 1992, kalpasan ti dua a tawen manipud idi damo a nangngegda ti kinapudno. Nagbautisar met ni manongda idi 1994.

Kabayatanna, saan unay a naginteres dagiti dadakkelda iti kinapudno gapu ta debotadoda a Katoliko. Imbilangda a makaisturbo dagiti Saksi ni Jehova, nupay dayawenda dagiti nasayaat a kondukta ken natakneng a panagkawkawes dagiti agtutubo a Saksi nga inawis dagiti annakda iti pagtaenganda. Ngem naginteresda idi pagsasaritaan dagiti annakda bayat ti pannanganda ti maipapan kadagiti naadalda iti gimong.

Nupay kasta, interesado dagiti dadakkelda iti panagkulam. Mammartek ni tatangda ken kabkabilenna ni nanangda. Ngannganin masinasina ti pamiliada. Kalpasanna, dua a lawas a nabalud ni tatangda ta adda dakes nga inaramidna kas bunga ti panagbarbartekna. Bayat a nakabalud, inrugina a basaen ti Biblia. Idi agbasbasa, nasiputanna ti sasao ni Jesus maipapan iti pagilasinan ti maudi nga al-aldaw. Namagpanunot dayta kadagiti dadakkelda isu a nakigimongda iti Kingdom Hall ken nagpayadalda iti Biblia iti pagtaenganda. Idi naammuanda ti kinapudno, dinadaelda amin a libroda maipapan iti panagkulam ken nadaeranda ti panangriribuk ti demonio babaen ti panangawagda iti nagan ni Jehova. Inrugidan a balbaliwan dagiti rumbeng a baliwanda iti personalidadda.

Mailadawanyo kadi ti ragsak da Maria ken Lucy idi nakitada a ni manongda a Hugo ti nangbautisar kadagiti dadakkelda iti maysa a kombension distrito idiay Bolivia idi 1999? Agarup siam a tawenen ti napalabas manipud idi damo a naammuan da Maria ken Lucy ti maipapan ken ni Jehova ken ti karkarina. Addadan nga agkakabsat iti amin-tiempo a ministerio. Anian a ragsakda ta ti pudno a panagdayaw pinagkaykaysana ti pamiliada!

[Footnote]