Inayatna ti Kinamanangngaasi

ITI edad a 82, ni Milton G. Henschel, a nabayagen a kameng ti Bagi a Manarawidwid dagiti Saksi ni Jehova, ket naturposnan ti panagbiagna ditoy daga idi Sabado, Marso 22, 2003.

Nagbalin ni Milton Henschel a kameng ti hedkuarter dagiti Saksi ni Jehova idi agkabannuag pay laeng ken simamatalek a nagserbi sadiay iti nasurok nga 60 a tawen. Dagus a nagdinamag gapu iti kinaannadna nga agpanunot ken napasnek nga interesna iti trabaho a panangikasaba iti Pagarian. Idi 1939, nagserbi kas sekretario ni N. H. Knorr, ti madama idi a manangaywan iti pagimprentaan dagiti Saksi ni Jehova idiay Brooklyn. Idi 1942, idi nga inrugi ni Kabsat Knorr nga idauluan dagiti Saksi iti intero a lubong, pinagtalinaedna ni Kabsat Henschel kas katulonganna. Idi 1956, inkasar ni Kabsat Henschel ni Lucille Bennett a kinabinnuligna kadagiti naragsak ken narigat a kasasaad iti biag.

Nasinged a nakipagtrabaho ni Kabsat Henschel ken ni Kabsat Knorr agingga iti ipapatay ni Kabsat Knorr idi 1977. Masansan idi nga agkuyog da Kabsat Henschel ken ni Kabsat Knorr nga agbiahe. Nasurok a 150 a pagilian ti napananda tapno bumisita ken mangparegta kadagiti Saksi ni Jehova iti intero a lubong, nangruna kadagiti misionero ken dagiti adda kadagiti sanga nga opisina. Makabannog ken napeggad pay dagita a panagbiahe no dadduma. Naidadanes iti kasta unay ni Kabsat Henschel gapu ta saan a nakiraman iti patriotiko a seremonia idi napan nakikombension idiay Liberia idi 1963.a Kalpasan ti sumagmamano a bulan, situtured a nagsubli ni Kabsat Henschel idiay Liberia tapno makisarita iti presidente iti dayta a pagilian ken padasenna a kiddawen ti dakdakkel a wayawaya iti panagdayaw dagiti Saksi ni Jehova sadiay.

No iti panangtaming kadagiti narikut a problema ken karit, nagdinamag ni Kabsat Henschel kas praktikal, mannakibagay, ken rasonable. Apresiaren dagiti kakaduana nangnangruna ti kinadalimanek, kinaemma, ken kinalaingna nga agpakatawa. Napigsa pay laeng ti memoriana isu a nasdaaw dagiti misionero iti intero a lubong ta daras la a malagipna ti nagnaganda, makapagsao bassit iti pagsasaoda, ken agangaw a makitam latta ti ragsak kadagiti matana.

Palagipannatayo ti Mikias 6:8 a kayat ni Jehova a Dios nga ‘ayatentayo ti kinamanangngaasi.’ Malaglagipto ni Milton Henschel gapu ta mapagulidanan iti dayta a banag. Uray no nadagsen ti responsabilidadna, nagtalinaed latta a mannakigayyem, nadungngo, ken naasi. Kaay-ayona nga ibaga ti kastoy, “No agduaduaka, laglagipem a ti naimbag a banag ket isu ti umiso.” Nupay lumdaangtayo iti ipupusay daytoy maipatpateg a kabsat, maragsakantayo ta nakapagibtur agingga iti ipapatayna, ket sigurado a naawatnan ti gunggonana a “korona ti biag.”​—Apocalipsis 2:10.

[Footnote]

[Ladawan iti panid 31]

Da M. G. Henschel ken N. H. Knorr

[Ladawan iti panid 31]

Kaduana ni Lucille nga asawana