Report Dagiti Manangiwaragawag iti Pagarian

Natignay a Mangipadayag iti Dios Gapu iti Maysa a Programa iti Telebision

KINUNA ni apostol Pablo a “dadduma ikaskasabada ti Kristo babaen iti apal ken rinnisiris, ngem ti met sabsabali babaen iti naimbag a nakem.” (Filipos 1:15) No dadduma, uray dagidiay mangikagumaan a mangpadakes iti ili ni Jehova di inggagara a naiturongda iti kinapudno dagiti nasayaat ti panagpuspusoda a tattao.

Idi Nobiembre 1998, naipabuya iti telebision iti intero a Francia ti maysa a dokumentario a mangitampok iti buya ti Bethel, dagiti pasilidad ti sanga nga opisina dagiti Saksi ni Jehova idiay Louviers, Francia. Iti laksid dagiti nagduduma a reaksion, di ninamnama a nangpataud dayta a programa kadagiti nasayaat a resulta.

Maysa kadagiti nagbuya iti programa isu ni Anna-Paula, a ti pagtaenganna ket 60 a kilometro laeng ti kaadayona manipud iti Bethel. Ni Anna-Paula, a maysa a diborsiada nga addaan iti dua nga annak, ket agsapsapul iti trabaho. Isu nga iti kabigatanna, immawag iti Bethel tapno agimtuod no adda bakante a trabaho sadiay. “Iti panagkunak, nasayaat dayta a lugar ken napateg ti trabaho a maar-aramid dita,” kinunana. Anian ti pannakasorpresana idi maammuanna nga amin dagidiay agserserbi iti Bethel ket ministro a boluntario a mangipapaay iti panawenda! Kalpasan ti ababa a panagsasarita maipapan kadagiti aktibidad dagiti Saksi ni Jehova, immanamong a masarungkaran tapno kasabaan dagiti Saksi.

Idi simmarungkar kenkuana ni Léna, maysa nga amin-tiempo a ministro iti lokal a kongregasion, maysa a napaut a panagpatang ti naaramid, ket inawat ni Anna-Paula ti libro a Pannakaammo a Mangiturong iti Biag nga Agnanayon.a Iti simmaganad a panagsarungkar, nabasan ni Anna-Paula ti intero a libro ket adu dagiti saludsodna. Situtulok a nagpayadal iti Biblia. Kinuna ni Anna-Paula: “Gundawayko a mabasa ti Sao ti Dios. Itatta laeng a naaddaanak iti Biblia.”

Idi Enero 1999, bimmisita ni Anna-Paula iti Bethel, ket iti simmaganad a lawas, damona a timmabuno iti Nakristianuan a gimong. Di nagbayag kalpasanna, inrugina nga inyadalan iti Biblia dagiti annakna ken kinasabaanna dagiti gagayyemna. “Diak malapdan nga isarita dagiti maad-adalko,” kunana. “Tarigagayak nga iranud dagiti kinapudno iti Biblia kadagiti tattao ken liwliwaen ida.” Kalpasan nga inkarigatanna a rinisut dagiti sumagmamano a parikutna, regular a makigimgimongen ni Anna-Paula. Napartak ti panagrang-ayna ket nabautisaran idi Mayo 5, 2002.

Kanayonanna, kas resulta ti nasayaat nga ulidan ken naregta a panangasaba ni Anna-Paula, nangrugi nga agadal iti Biblia ni nanangna ket nabautisaran di nagbayag. “Diak mailadawan ti rag-ok,” kuna ni Anna-Paula. “Inaldaw nga agyamanak ken ni Jehova gapu ta impalubosna a maam-ammok ken makapagserbiak kenkuana ken gapu kadagiti amin a bendisionna.”

[Footnote]

[Dagiti Ladawan iti panid 8]

Iti ngato: Ni Anna-Paula

Iti baba: Ti pagserkan ti sanga nga opisina idiay Francia