‘Maysa Kadagiti Kasayaatan nga Aramid ti Inhenieria’
IDI nabangon ti templo ni Jehova idiay Jerusalem kabayatan ti panagturay ni Ari Solomon agarup 3,000 a tawenen ti napalabas, naaramid ti maysa a nagpintas a gambang a pagurnongan iti danum ket naiplastar iti ruar ti pagserkan ti templo. Nasurok a 30 a tonelada ti kadagsenna ken makalaon iti agarup 40,000 a litro a danum. Daytoy nagdakkel a pagkargaan ket naawagan iti sinukog a baybay. (1 Ar-ari 7:23-26) “Awan duadua a maysa daytoy kadagiti kasayaatan nga aramid ti inhenieria iti Hebreo a nasion,” kuna ti maysa a dati nga opisial ti National Research Council of Canada, a ni Albert Zuidhof, iti Biblical Archeologist.
Kasano ti pannakaaramid ti sinukog a baybay? “Idiay Distrito ti Jordan a sinukog ti ari [dagiti gambang nga aruaten] iti molde a pila,” kuna ti Biblia. (1 Ar-ari 7:45, 46) “Ti proseso ti panangsukog ket mayarig iti ‘lost wax’ a metodo a maus-usar agingga ita iti panagaramid kadagiti dadakkel a bronse a kampanilia,” kuna ni Zuidhof. Inlawlawagna: “Maysa a sinsinan baybay a naaramid iti allid ket nasukog iti naan-anay a namaga a pangmoldean. . . . Kalpasan a maaramid dayta, kurtian ti diseniador ti namolde nga allid iti pagsukogan sana pamagaan. Ti maudi nga addang isu ti panangrunaw tapno maikkat ti allid sa maibukbok ti likido a bronse iti pagsukogan.”
Ti nagdakkel ken nadagsen a sinukog a baybay kalikagumanna ti kinalaing iti panagbangon. Ti makin-uneg ken makinruar ti pagsukogan ket nasken a makaandur iti agarup 30 a tonelada ti sinukog a bronse, ken masapul nga agtultuloy ti proseso ti panangsukog tapno maliklikan ti panagbettak wenno aniaman a depekto. Nalabit agkalikagum daytoy iti nakalinia nga urno a paglabasan ti maibukbok a narunaw a metal iti pagsukogan. Anian a nagdakkel a trabaho dayta!
Iti kararagna idi inagurasion ti templo, inted ni Ari Solomon ti dayaw ken ni Jehova a Dios gapu iti pannakairingpas ti templo, a kunkunana: “Inaramidmo ti kari babaen iti bukodmo a ngiwat, ken babaen iti bukodmo nga ima inaramidmo ti kaitungpalan.”—1 Ar-ari 8:24.