Apay a Kanayon a Sarungkarandakayo Dagiti Saksi ni Jehova?
ITI sangalubongan, agdinamag ti kinapinget dagiti Saksi ni Jehova a mangasaba iti binalaybalay. Masmasdaaw ti dadduma a tattao no apay a kanayon a sumarungkar kadakuada dagiti Saksi, idinto ta saanda nga interesado iti mensahe dagiti Saksi idi damo. Tumulong a mangilawlawag ti dua a surat manipud Russia.
“Kinapudnona,” inamin ni Masha, agtawen iti 19 a babai idiay Khabarovsk, “kasla angol idi a liklikak dagiti Saksi ni Jehova.” Ngem kalpasan a nabasana ti sumagmamano a kopia dagiti magasin nga impablaak dagiti Saksi, nagbalbaliw ti panangmatmatna. “Makapainteres ken makaisuro dagiti nabasak,” insurat ni Masha, “ngem kapatgan iti amin, balbaliwanna ti panangmatmatmo iti lubong. Mangrugin a maawatak no ania ti panggep ti biag.”
Manipud iti siudad ti Ussuriysk, agarup 80 a kilometro iti amianan ti Vladivostok, insurat ni Svetlana: “Inrugik itay nabiit ti agbasa iti Ti Pagwanawanan ken Agriingkayo! Napateg unay dagitoy a magasin iti kaaldawantayo. Magustuak amin dagiti artikulo. Makapainteres unay, makaisuro, ken manglawlawag dagiti linaonda. Agyamanak! Agyamanak unay gapu ta addakayo ken gapu iti kasta a naasi ken napateg a trabahoyo.”
Dagiti Saksi ni Jehova iti sangalubongan talaga nga ipangpangagda ti mamagpanunot a saludsod ni apostol Pablo: “Kasano ti pannakangngeg [dagiti tattao] no awan ti mangasaba?” (Roma 10:14) Apay a dikay dumngeg biit no sumarungkar kadakayo dagiti Saksi? Mabalinyo met a tagiragsaken ti makaliwliwa a mensahe a masarakan iti Sao ti Dios, ti Biblia.