Babaen ti Tulong ti Biblia, Nasarangetna ti Sulisog

Nagadu ti pakasulisogan ditoy lubong ita. Saan a nalaka nga annuroten dagiti pagalagadan ti Biblia. Kas pagarigan, mabalin a narigat nga ipangag ti balakad ti Biblia: “Adaywanyo ti pannakiabig.”​—1 Corinto 6:18.

Maysa kadagiti Saksi ni Jehova, nga awagantayo iti Sebastian, ti agtartrabaho iti maysa a kompania ti Scandinavia idiay Poland. Masapul a makidangadang tapno masalimetmetanna ti kinatarnawna.

Ammo dagiti katrabahuan ni Sebastian nga isu ket maysa kadagiti Saksi ni Jehova. Gapu iti kinagaget ken nasayaat nga ugalina, inikkan dagiti superbisorna iti nagduduma a pribilehio. Ngem naammuanna idi agangay a nairaman kadagitoy a pribilehio ti itatabunona kadagiti miting ti negosio a nalaokan iti imoral a panaglinglingay.

Dagus a nagpangadua ni Sebastian. “Ammo ti amok a maysaak kadagiti Saksi ni Jehova. Dayta ti makagapu nga agtalek ken agpannuray kaniak. No diak agtungpal, mapukawko ti trabahok, a narigat a sapulen. Ania ngata no agpaliiwak laeng, a diak makipaset iti panaglinglingay?”

Ngem adda pay sabali a maipaaramid ken ni Sebastian. Nasken nga “aywananna” dagiti ganggannaet a kliente babaen ti panangipaayna kadakuada kadagiti babbai a makadennada iti rabii. Ania ti inaramidna?

Inkeddeng ni Sebastian nga ipalagip iti superbisor ti maipapan iti naibatay-Biblia a takderna mainaig iti imoralidad. Nabigbig ni Sebastian a napeggad ti trabahona ket masapul nga umikkat iti trabahona iti kabiitan a tiempo. Nakasarak ni Sebastian iti sabali a trabaho a nababbaba ti sueldo ngem awan ti kasta a sulisog. Ita, awanen ti mangsidir iti konsiensiana.

Ania ti aramidem no adda mangpilit kenka a makiraman wenno mangpanuynoy iti imoralidad? Nakasaganaka kadi nga agtignay a dagus? Kasta ti inaramid idi ni Jose, kas naisalaysay iti Genesis 39:7-12.