Report Dagiti Manangiwaragawag iti Pagarian
‘Umallatiwka ket Tulongannakami’
IDI Hulio 2000, naawis dagiti Aleman ti pagsasaoda a Saksi idiay Austria, Alemania, ken Switzerland tapno umakarda idiay Bolivia. Apay? Agsipud ta kadagiti naiputputong a komunidad dagiti mannalon, iti uneg ti 300 a kilometro a kaadayo manipud Santa Cruz, Bolivia, adda dagiti Aleman ti pagsasaoda a Mennonite nga interesado unay iti Biblia.
Agarup 140 a Saksi ti napan. Adda dagiti nagtalinaed iti sumagmamano a lawas, dagiti dadduma maysa wenno ad-adu pay a tawen. Gapuna, impakitada ti kababalin nga umasping kadagiti misionero idi umuna a siglo a nangipangag iti awis: “Umallatiwka iti Macedonia ket tulongannakami.”—Aramid 16:9, 10.
Ania ti kasasaad ti panangasaba iti dayta a teritoria? Inlawlawag ti maysa a panglakayen iti kongregasion sadiay: “Ti panagbiahe a mapan iti maysa kadagiti 43 a kolonia dagiti Mennonite ket mabalin nga agpaut iti walo nga oras kadagiti di sementado a kalsada babaen ti de dual a lugan. Ti panagbisita kadagiti ad-adayo a lugar ket masansan nga agkasapulan iti panagdaliasat iti uppat nga aldaw ken pannaturog kadagiti tolda iti sumagmamano a rabii. Ngem napateg ti panangikagumaan agsipud ta di pulos nangngegan dagitoy a tattao ti naimbag a damag.”
Idi damo, adu kadagiti Mennonite ti saan a nangapresiar iti isasarungkar kadakuada. Ngem babaen ti nagtultuloy a panangikagumaan, natulonganda a mangipateg iti mensahe dagiti Saksi. Kas pagarigan, kinuna ti maysa a mannalon a maysa a tawenen nga agbasbasa kadagiti magasin nga Agriingkayo! Sa innayonna: “Ammok nga adu a tattao ditoy ti saan nga umanamong iti ibagbagayo, ngem patiek nga isu dayta ti kinapudno.” Iti maysa a kolonia, kinuna ti maysa a lalaki: “Addada kaarrubak a mangibaga nga ulbodkayo a mammadto, ngem ibaga ti dadduma nga adda kadakayo ti kinapudno. Kayatko a takuaten a mismo.”
Adda itan ti Aleman ti pagsasaona a kongregasion idiay Bolivia, nga addaan iti 35 nga agibumbunannag, agraman 14 nga amin-tiempo a managebanghelio. Addan ti 14 a dati a Mennonite a nagbalin a manangiwaragawag iti Pagarian, ken 9 a sabali pay ti regular a tumabtabuno kadagiti gimong. Maysa a lakay a nabiit pay a nabautisaran ti nagkuna: “Nabatad kadakami ti panangiwanwan ni Jehova. Nangibaon kadagiti aduan kapadasan, Aleman ti pagsasaoda a kakabsat a tumulong kadakami. Agyamankami unay.” Innayon ti nagpabautisar met a balasangna nga agtawen iti 17: “Maayatanak iti kinaregta dagiti agtutubo nga immay ditoy. Payunir ti kaaduan kadakuada, a mangbusbusbos iti panawen ken kuartada a tumulong kadagiti sabsabali. Kayatko a tuladen ida.”
Pudno nga agsagsagrap iti kasta unay a rag-o ken pannakapnek dagiti mangikagumaan nga “umallatiw” tapno tumulong.