Adda Kadi Maaramidan Dagiti Kararagyo?

SIASINO koma kadatayo ti saan a naipasango iti kasasaad a ditay malapdan? Ipakita ti Biblia nga ammo ni apostol Pablo a ti kararag mabaliwanna ti pagbanagan ti kasta a situasion.

Idi saan a nainkalintegan a naibalud ni Pablo idiay Roma, kiniddawna kadagiti kapammatianna nga ikararaganda, ket innayonna: “Bagbagaankayo a nangnangruna pay nga aramidenyo daytoy, tapno maisubliak kadakayo iti kabiitan a panawen.” (Hebreo 13:18, 19) Iti sabali a gundaway, inyebkas ni Pablo ti panagtalekna a sungbatan ti Dios dagiti kararag para iti nasakbay a pannakawayawayana. (Filemon 22) Natungpal dayta ket intultuloyna ti trabahona a panagmisionero.

Ngem talaga kadi a mabaliwan dagiti kararagyo ti epekto dagiti parikutyo? Nalabit. Ngem laglagipenyo a ti kararag ket saan laeng a basta pormal a narelihiosuan a kaugalian. Dayta ket aktual a pannakikomunikar iti naayat ken mannakabalin nga Amatayo idiay langit. Nasken a ditay bumdeng nga agbalin nga espesipiko kadagiti kararagtayo ngem kalpasanna siaanus nga urayentayo no kasano ti isusungbat ni Jehova.

Mabalin a saan a direkta a sungbatan ti Dios ti tunggal kararag, ken nalabit a saan a kanayon a sumungbat iti pamay-an wenno iti oras a namnamaentayo. Kas pagarigan, naulit-ulit a nagkararag ni Pablo maipapan iti ‘siit iti lasagna.’ Saan nga inikkat ti Dios ti parikut ni Pablo, aniaman dayta, ngem liniwliwana ni Pablo babaen dagitoy a makapabileg a sasao: “Umdasen kenka ti di kaikarian a kinamanangngaasik, ta ti pannakabalinko maan-anay iti pagkapuyan.”​—2 Corinto 12:7-9.

Makapagtalektayo met a nupay saan nga ikkaten ti Dios ti partikular a parikut, mabalinna ti ‘mangaramid iti dalan a pagruaran tapno mabalinantayo nga ibturan dayta.’ (1 Corinto 10:13) Iti din agbayag, ikkatento ti Dios dagiti amin a sagsagabaen ti tao. Kabayatanna, dakkel ti maaramidan ti iyaadani iti “Managdengngeg iti kararag.”​—Salmo 65:2.