‘Agkararagkayo a Kastoy’

KABESADOYO kadi ti Kararag ti Apo? Modelo a kararag dayta nga insuro ni Jesu-Kristo. Bayat ti nalatak a Sermonna iti Bantay, kinuna ni Jesus: “Agkararagkayo, ngarud, a kastoy.” (Mateo 6:9) Yantangay ni Jesus ti nangisuro iti dayta, masansan a maawagan dayta kas ti Kararag ti Apo, a maawagan met kas ti kararag nga Amami.​—Latin, Paternoster.

Iti intero a lubong, kabesado ti minilion a tattao ti Kararag ti Apo ken masansan nga ulitenda dayta, nalabit inaldaw. Kadagiti nabiit pay a tawtawen, adu ti mangbitla iti dayta a kararag kadagiti eskuelaan ken kadagiti pasken iti publiko. Apay a maipatpateg unay ti Kararag ti Apo?

Insurat ni Cyprian a teologo idi maikatlo a siglo: “Ania pay koma ti naespirituan a kararag a nasaysayaat ngem iti insuro kadatayo ni Kristo . . . ? Ania pay koma a kararag iti Ama ti ad-adda a napudno ngem iti insuro kadatayo ti Anak nga isu ti Kinapudno?”​—Juan 14:6.

Iti katekismo ti Iglesia Katolika Romana, naibilang ti Amami kas ti “kangrunaan a kararag dagiti Kristiano.” Ti The World Book Encyclopedia bigbigenna ti napateg nga akem daytoy a kararag iti amin a relihion ti Kakristianuan, nga inawaganna dayta kas maysa kadagiti “kangrunaan nga ebkas ti Nakristianuan a pammati.”

Nupay kasta, nasken a bigbigen nga adu ti mangbitbitla iti Kararag ti Apo ngem saanda a naan-anay a maawatan dayta. “No addaankayo iti aniaman a Nakristianuan a nalikudan, nalabit a nagbiityo a baliksen ti Kararag ti Apo nga awan panagsarimadeng,” kuna ti Ottawa Citizen a periodiko ti Canada, “ngem nalabit a marigatankayo no in-inayadenyo a baliksen dayta buyogen ti pannakaawat.”

Talaga kadi a napateg a maawatantayo dagiti kararagtayo iti Dios? Apay nga insuro kadatayo ni Jesus ti Kararag ti Apo? Ania ti kaipapananna dayta kenka? Usigentay ita dagitoy a saludsod.