‘Birokenyo No Siasino ti Maikari’
TI Damasco ket maysa a narang-ay a siudad idi umuna a siglo iti Kadawyan a Panawentayo. Gapu ta nalikmut kadagiti agbunga a kaykayo, makapabang-ar dayta kadagiti bunggoy nga agdaldaliasat manipud kadagiti lugar a masarakan iti daya ti Damasco. Di nagbayag kalpasan ti ipapatay ni Jesu-Kristo, adda maysa a kongregasion Kristiano idiay Damasco. Adda dagiti kamengna a Judio a nalabit nagbalin a pasurot ni Jesus bayat ti Piesta ti Pentecostes idiay Jerusalem idi 33 K.P. (Aramid 2:5, 41) Dadduma kadagiti adalan idiay Judea ti nalabit immakar idiay Damasco idi nagraira ti panangidadanes kalpasan ti pannakaubor ni Esteban.—Aramid 8:1.
Mabalin a kabayatan ti 34 K.P., maysa a Kristiano manipud Damasco nga agnagan Ananias ti nakaawat iti naidumduma nga annongen. Kinuna kenkuana ti Apo: “Tumakderka, mapanka iti kalsada a maawagan Nalinteg, ket iti balay ni Judas sapulem ti maysa a tao a managan Saulo, a taga Tarso. Ta, adtoy! isu agkarkararag.”—Aramid 9:11.
Ti kalsada a maawagan Nalinteg ket agarup maysa ket kagudua a kilometro ti kaatiddogna ken lumasat dayta iti sentro ti Damasco. Iti maika-19 a siglo a lamina a makita ditoy a panid, makaalatayo iti sumagmamano nga ideya no ania ti itsurana dayta a kalsada idi un-unana. Gapu iti disenio ti kalsada, mabalin a saan a kaskarina a dagus a masarakan ni Ananias ti balay ni Judas. Ngem nasarakan dayta ni Ananias ket ti panagbisitana nagbanag iti panagbalin ni Saulo kas apostol Pablo, maysa a naregta a manangiwaragawag iti naimbag a damag.—Aramid 9:12-19.
Imbaon ni Jesus dagiti adalanna ken imbagana kadakuada a ‘birokenda dagidiay maikari’ iti naimbag a damag. (Mateo 10:11) Nabatad a literal a sinapul ni Ananias ni Saulo. Kas ken ni Ananias, dagiti Saksi ni Jehova siraragsak a sapulenda dagiti maikari ket maragsakanda no dagiti tattao awatenda ti naimbag a damag ti Pagarian. Anian a makagunggona ti panangbirok kadagiti napasnek.—1 Corinto 15:58.
[Ladawan iti panid 32]
Ti agdama a “kalsada a maawagan Nalinteg”
[Picture Credit Line iti panid 32]
Manipud iti libro a La Tierra Santa, Tomo II, 1830