Pannangan​—Saan Laeng nga Oras Tapno Mangan!

URAY siasino, kaay-ayona ti naimas a taraon. Sa danggayam dayta iti naragsak a panagsasarita ken pannakilangen kadagiti ipatpategmo, pudno a makaay-ayo ti kasta a pannangan a saan laeng a basta mangpennek iti mabisin a tian. Adu a pamilia ti nangyugali nga aggigiddan a mangan uray maminsan la iti agmalem. Ti oras ti pannangan ket mangted iti gundaway a mapagsasaritaan ti pamilia ti aktibidad wenno plano iti agmalem. No imdengan dagiti nagannak ti ibaga dagiti annakda, masaripatpatanda ti pampanunot ken rikrikna dagiti ubbingda. Inton agangay, ti naragsak ken relaks a panaglalangen bayat ti pannangan parayrayenna ti pannakarikna iti kinatalged, panagtalek, ken ayat nga ad-adda a mangpalagda iti singgalut ti pamilia.

Ita, gapu ta okupado ti adu a kameng ti pamilia, marigatanda nga aggigiddan a mangan. Iti dadduma a pagilian, saan a kaugalian dagiti pamilia ti aggigiddan a mangan wenno agsasarita bayat ti pannangan. Dadduma a pamilia ti nairuam nga agbuya iti telebision bayat ti pannangan, isu a masayang ti gundaway a makapagsasaritada koma iti nabagas.

Ngem kadagiti Kristiano a nagannak, kanayon nga aprobetsarenda dagiti gundaway a mapabilegda ti pamiliada. (Proverbio 24:27) Nabayagen a naibaga kadagiti nagannak a ti maysa a kasayaatan a gundaway tapno maisuroda kadagiti annakda ti sao ti Dios ket kabayatan a ‘nakatugawda iti pagtaenganda.’ (Deuteronomio 6:7) No regular nga agsasango a mangan, adda naisangsangayan nga oportunidad dagiti nagannak a mangparayray iti panagayat dagiti annakda ken ni Jehova ken kadagiti nalinteg a prinsipiona. No aramiden a naragsak ken relaks ti panagsasango, mapagbalinyo a makaay-ayo ti oras ti pannangan ken makapabileg dayta iti pamiliayo. Wen, aramidenyo koma nga ad-adda a makagunggona ti pannangan!