‘Umasping iti Napateg a Nalabaga ti Marisna a Bato’
NASIRMATA ni apostol Juan ti maysa a nadayag a trono idiay langit. Kasla “bato a jaspe” Daydiay nakatugaw iti trono. ‘Umasping met iti napateg a nalabaga ti marisna a bato.’ (Apocalipsis 4:2, 3) Ania dagitoy a bato?
Dagitoy ket nasaragasag a bato a sumilap ti rabawda. Idi un-unana, ti Griego a sao a naipatarus iti “jaspe” ket nausar a pangtukoy kadagiti bato a nagduduma ti marisna, agraman dagiti napapateg a nasin-aw a saniata. Ti “bato a jaspe” iti Apocalipsis 4:3 ket “sigurado a saan a ti nalaka a jaspe ita,” kuna ni A. T. Robertson iti Word Pictures in the New Testament. Iti libro nga Apocalipsis, dineskribir pay ni Juan ti nailangitan a siudad a Jerusalem, a kunkunana: “Ti raniagna umasping iti kapapatgan a bato, kas maysa a bato a jaspe nga agsilsilnag a kas aganninaw a kristal.” (Apocalipsis 21:10, 11) Dagiti bato a dakdakamaten ni Juan ket nalawag a nasin-aw, a mabalin a salputen ti lawag.
Daydiay nasirmata ni Juan a nakatugaw iti trono isu ti kadadayagan a Persona iti uniberso, ni Jehova a Dios. Isu ti kasin-awan ken kasantuan. Maitunos iti dayta, insurat ni apostol Juan: “Ti Dios ket silaw ken awan a pulos ti sipnget a naikaykaysa kenkuana.” (1 Juan 1:5) Gapuna, indagadag ni Juan kadagiti manamati a ‘gugoranda ti bagida no kasano a ni Jehova nasin-aw.’—1 Juan 3:3.
Ania ti masapul nga aramidentayo tapno nasin-awtayo iti panangmatmat ni Jehova? Nakapatpateg a maaddaantayo iti pammati iti naiparukpok a dara ni Kristo agpaay iti pannakapakawan dagiti basoltayo. Masapul met nga itultuloytayo ti ‘magna iti lawag’ babaen ti regular a panagadaltayo iti Biblia ken panagbiag a maitunos kadagiti pannursurona.—1 Juan 1:7.