Panangpennek iti Kasapulan Idiay Macedonia

“UMALLATIWKA iti Macedonia ket tulongannakami.” (Aramid 16:9) Daytoy a sasao ti maysa a lalaki a nasirmata ni apostol Pablo ipakitana a kasapulan nga ideklara ti naimbag a damag ti Pagarian ti Dios iti baro a teritoria, kadagiti siudad a masarakan ita iti Grecia

Iti agdama a nasion ti Macedonia, maysa laeng ti Saksi ni Jehova iti kada 1,840 nga umili. Adu a tattao ti di pay pulos nakangngeg iti maipapan ken ni Jehova a Dios. Wen, dagiti umili iti daytoy a nasion masapul a mangngegda ti mensahe ti talna iti kabiitan a panawen.​—Mateo 24:14.

Nangipaay ti Dios iti gundaway tapno mapennek dayta a pakasapulan. Maysa nga aldaw idi Nobiembre 2003, adda di ninamnama a nagtelepono iti opisina dagiti Saksi ni Jehova idiay Skopje, Macedonia. Manipud dayta iti Macedonian Center for International Cooperation, a mangaw-awis kadagiti Saksi a mangipasdek iti puestoda tapno mailawlawagda dagiti patpatienda bayat ti tallo nga aldaw nga eksibit a mangrugi iti Nobiembre 20. Anian a nagdakkel a gundaway a makasarita ti rinibu a tao a pulos a saan pay a nakangngeg iti naimbag a damag ti Pagarian!

Nagtrabaho a siaanep dagiti boluntario tapno maisagana ken maiplastar dagiti nadumaduma a publikasion dagiti Saksi ni Jehova iti lenguahe dagiti taga-Macedonia. Iti kasta, magun-od dagiti bisita dagiti kopia ti literatura a tarigagayanda. Nangipaay dayta iti gundaway iti adu tapno makagun-odda iti libre a danum a makapabang-ar iti naespirituan.​—Apocalipsis 22:17.

Nangpili dagiti bisita kadagiti publikasion a mainaig iti biagda, kas iti Dagiti Saludsod nga Iyimtuod ti Agtutubo​—Dagiti Sungbat nga Epektibo ken Ti Sekreto ti Kinaragsak iti Pamilia.a Siam a pulo ket walo ti nangted iti adresda, a mayat nga agpasarungkar kadagiti Saksi ni Jehova. Positibo ti komento ti adu maipapan iti nasayaat a trabaho dagiti Saksi ni Jehova ken iti kalidad dagiti literatura.

Maysa a lalaki a mangkibkibin iti anakna ti immasideg iti puesto dagiti Saksi. Inyimtuod ti ama no adda literatura a maibagay kadagiti ubbing. Impakita dagiti Saksi ti publikasion a Ti Librok Dagiti Estoria ti Biblia.b Linukibna dayta ket sigagagar nga inyimtuodna no mano ti gatadna. Ad-adda pay a naragsakan idi nangngegna a ti trabaho a panangisuro dagiti Saksi ni Jehova ket naan-anay a supsuportaran dagiti boluntario a donasion. (Mateo 10:8) Impakitana ti libro iti anakna ket kinunana: “Nagsayaaten a libro! Ibasaanka iti maysa nga estoria iti kada aldaw!”

Maysa a propesor iti pilosopia ti immasideg iti puesto. Interesado unay iti aniaman a relihion ngem nangruna iti patpatien dagiti Saksi ni Jehova. Idi kinitana ti linaon ti libro a Ti Panangbiruk ti Sangatauan iti Dios,c kinuna ti propesor: “Lohikal ti pannakaiparang ti linaon daytoy a libro! Kastoy ti kayatko a rumbeng a pannakaiparang dagiti bambanag.” Idi agangay, addada estudiante manipud iti pagisursuruanna nga eskuelaan ti immay iti puesto ket nagkiddawda iti bukodda a kopia ti libro a kas iti nagun-od ti propesorda. Tarigagayanda nga adalen dayta a libro. Patienda nga usaren dayta ti propesorda iti panangisurona kadakuada.

Gapu iti eksibit, dadduma a tattao ti damo a nakabasa ken nakangngeg kadagiti Nainkasuratan a kinapudno. Maysa a grupo dagiti tuleng a tin-edyer ti immasideg tapno mangkitada iti kayatda. Maysa kadagiti Saksi ti nagpalawag babaen ti tulong ti maysa a balasitang a nangipakaawat iti dayta babaen ti senias. Babaen kadagiti ilustrasion iti libro a Ti Katan-okan a Tao a Nagbiag Pay Laeng,d inlawlawagna a pinaimbag ni Jesus dagiti masakit, agraman dagiti tuleng. Naragsakanda a nakaammo iti kari ti Biblia nga asidegen nga aramiden ni Jesus ti kasta a panangpaimbag kadagiti tattao iti kaaldawantayo. Adu kadakuada ti siraragsak a nangawat iti literatura a naibatay iti Biblia, ket nayurnos nga adda Saksi a makaammo nga agsenias a mangbisita kadakuada.

Malaksid iti lenguahe ti Macedonia, adda met dagiti literatura iti pagsasao nga Albaniano, Ingles, ken Turko. Maysa a lalaki a saan a makaammo iti Macedoniano ti nagkiddaw iti sumagmamano nga Ingles a literatura. Kalpasan a nakaawat kadagiti isyu ti magasin a Pagwanawanan ken Agriingkayo!, nadakamatna nga ammona ti agsao iti Turko. Idi maipakita kenkuana dagiti literatura iti lenguahena, nasdaaw daytoy! Nariknana a talaga a tarigagayan dagiti Saksi ni Jehova ti tumulong iti isuamin.

Anian a nagsayaat ti naaramid a panangsaksi bayat dayta nga okasion, ken anian a makaparegta a makita ti nagadu a tattao nga aginteres iti kinapudno iti Biblia! Wen, linuktan ni Jehova ti dalan tapno ad-adda pay a maisaknap ti naimbag a damag ti Pagarian idiay Macedonia.

[Footnote]

[Kahon/Dagiti Ladawan iti panid 9]

DAKKEL A PANAGRANG-AY

Idi Mayo 17, 2003, naaramid ti maysa a dakkel nga addang tapno maisaknap ti naimbag a damag ti Pagarian ti Dios. Naidedikar ti opisina dagiti Saksi ni Jehova idiay Skopje. Nagpaut ti trabaho a panagibangon iti dua a tawen, a namagbalin kadagiti pasilidad a mamimpat a dakdakkel ngem iti dati.

Adda tallo a nagduduma a pasdek a pakasarakan iti administrasion ken opisina dagiti agipatpatarus agraman dagiti pagnaedan, kosina, ken paglabaan. Ni Guy Pierce, maysa a kameng ti Bagi a Manarawidwid dagiti Saksi ni Jehova, impaayna ti palawag ti dedikasion. Ti programa ti dedikasion ket tinabunuan dagiti bisita manipud iti sangapulo a pagilian. Naragsakan ti amin a nakakita kadagiti nagpipintas a baro a pasdek.

[Mapa iti panid 8, 9]

(Para iti aktual a pannakaurnosna, kitaem ti publikasion)

BULGARIA

MACEDONIA

Skopje

ALBANIA

GRECIA

[Ladawan iti panid 8]

Skopje, Macedonia