Salsaludsod Dagiti Agbasbasa
Apaman a nangngegda nga adda iti ridaw ti naibalud a ni Pedro, apay a kinuna dagiti adalan: “Ti anghelna dayta”?—Aramid 12:15.
Nalabit a sibibiddut nga impagarup dagiti adalan a ti sitatakder iti ruangan ket maysa a mensahero nga anghel a mangibagi ken ni Pedro. Usigentayo ti konteksto daytoy a teksto.
Ni Herodes, a nangipapatay ken ni Santiago, pinaarestona ni Pedro. Gapuna, adda rason a panunoten dagiti adalan a napapatay met ni Pedro. Kas maysa a balud, nakakawar idi ni Pedro bayat a bambantayan ti uppat a soldado iti uppat a reliebo kada aldaw. Kalpasanna, iti maysa a rabii, isu ket simimilagro a winayawayaan ken inruar ti maysa nga anghel manipud iti pagbaludan. Idi naawatan met laeng ni Pedro no ania ti napasamak, kinunana: “Ita agpayso nga ammokon nga imbaon ni Jehova ti anghelna ket inispalnak iti ima ni Herodes.”—Aramid 12:1-11.
Dagus a napan ni Pedro iti balay ni Maria nga ina ni Juan Marcos, a nagtataripnongan ti adu nga adalan. Idi nagtuktok iti ridaw, maysa nga adipen a babai nga agnagan iti Roda ti napan nanglukat. Idi mabigbigna ti timek ni Pedro, timmaray a napan nangibaga kadagiti dadduma idinto a dina pay pinastrek ni Pedro! Idi damo, narigat a patien dagiti adalan a ni Pedro ti adda iti ruangan. Imbes ketdi, sibibiddut nga impapanda: “Ti anghelna dayta.”—Aramid 12:12-15.
Patien kadi dagiti adalan a natayen ni Pedro ket ti espirituna ti adda iti ruangan? Imposible a kasta yantangay dagiti pasurot ni Jesus ammoda ti Nainkasuratan a kinapudno maipapan kadagiti natay—a “saanda a sipapanunot iti aniaman.” (Eclesiastes 9:5, 10) Ania ngarud ti kayat a sawen dagiti adalan idi kinunada: “Ti anghelna dayta”?
Ammo dagiti adalan ni Jesus nga iti intero a historia, personal a timmulong dagiti anghel kadagiti adipen ti Dios. Kas pagarigan, tinukoy ni Jacob ti “anghel a nangal-alangon kaniak iti isuamin a didigra.” (Genesis 48:16) Ken no maipapan iti maysa nga ubing iti tengngada, kinuna ni Jesus kadagiti pasurotna: “Siguraduenyo a dikay umsien ti maysa kadagitoy a babassit; ta ibagak kadakayo a dagiti anghelda sadi langit kanayon a makitada ti rupa ni Amak nga adda sadi langit.”—Mateo 18:10.
Makapainteres ta ti Young’s Literal Translation of the Holy Bible impatarusna ti sao nga agʹge·los (“anghel”) kas “mensahero.” Agparang a ti dadduma a Judio patienda nga adda bukod nga anghel ti tunggal adipen ti Dios—maysa nga “anghel de la guardia.” Siempre, ti kasta a panangmatmat ket saan a direkta nga isuro ti Sao ti Dios. Kaskasdi, posible nga idi kinuna dagiti adalan, “Ti anghelna dayta,” impagarupda a maysa a mensahero nga anghel a mangibagi ken ni Pedro ti agtaktakder iti ruangan.