Nagunggonaan a Panagdaliasat

MANIPUD iti Democratic Republic of Congo, naipadamag a dua nga agkabsat a babbai ti nangikeddeng nga agdaliasat iti adayo tapno matabunuanda ti “Idayawyo ti Dios” a Kombension Distrito idiay Lisala. Kaipapananna dayta ti ilalasatda iti lugar a pakapaspasamakan ti gubat. Malaksid a kayatda a matagiragsak ti naespirituan a pannakaisuro ken Nakristianuan a timpuyog iti kombension, magagaranda met a maam-ammo dagiti pannakabagi ti sanga nga opisina dagiti Saksi ni Jehova idiay Kinshasa. Gapu iti gerra sibil iti pagilian, adu a tawenen nga awan ti nakitada a kakabsat manipud iti sanga nga opisina isu a tarigagayanda a gundawayan dayta nga okasion a makita ida.

Nagdaliasat dagiti dua a kabsat iti kawatiwat a 300 a kilometro manipud iti ilida a Basankusu agingga idiay Lisala, a limmasatda iti kabakiran ken iti dua a karayan babaen ti takuli. Nagpaut iti tallo a lawas dayta a panagdaliasatda. Yantangay agserserbida kas amin-tiempo a ministro iti 3 ken 19 a tawenen, insaknapda ti naimbag a damag ti Pagarian bayat ti panagdaliasatda. Nangbusbosda iti 110 nga oras a nangasaba kadagidiay masabetda iti dalan, ket nakaipaimada iti 200 a polieto ken 30 a magasin.

Iti panagdaliasatda babaen ti takuli, kasapulan a lumasatda kadagiti disso nga ayan dagiti hipopotamo ken buaya a gagangay iti dayta a rehion. Saanda a mabalin ti agdaliasat iti karayan no rabii gapu ta napeggad unay! Kasapulan met a lumasatda iti adu a check point ti militar.

Nupay nawatiwat ken makabannog unay dayta a panagdaliasat, naragsakan dagitoy a kakabsat iti panagreggetda. Agyamyaman ken maragsakanda unay ta natabunuanda ti kombension idiay Lisala. Arigna a sumsumged ti pusoda iti panagtarigagay iti kinapudno, ken naparegtada iti pannakitimpuyogda iti 7,000 a kakabsat a timmabuno. Kalpasan ti kombension, naipasangoda manen kadagiti isu met laeng a karit bayat ti panagdaliasatda nga agawid, ket nasangpetanda a natalged dagiti kapamiliada.