“Nawayawayaanda Koma a Dagus”
NI GENEVIÈVE DE GAULLE, kaanakan ni Charles de Gaulle a dati a presidente ti Francia, personal a naam-ammona dagiti Saksi ni Jehova iti kampo konsentrasion ti Nazi idiay Ravensbrück, makin-amianan nga Alemania. Insuratna dagita a sasao iti ngato idi Agosto 1945.
Idi Enero 27, 1945, naiserran ti kampo konsentrasion iti Auschwitz, Poland. Sipud idi 1996, dayta a petsa ti nagbalin nga aldaw ti pananglaglagip idiay Alemania para kadagiti biktima ti Third Reich ni Hitler.
Bayat ti opisial a panglaglagip a palawag idi Enero 27, 2003, ni Peter Straub a presidente ti State Parliament ti Baden-Württemberg inkomentona: “Dagidiay nagsagaba iti pannakaidadanes gapu iti narelihiosuan wenno napolitikaan a patpatienda ken situtulok a mangawat iti ipapatay imbes nga agkompromiso ket maikari iti panagraemtayo, maysa a panagraem a saan a basta maiyebkas iti sasao. Dagiti Saksi ni Jehova ti kakaisuna a relihion a naan-anay a saan a nagtungpal kadagiti bilin ti rehimen ni Hitler: Saanda a nagsaludo ken ni Hitler. Nagkedkedda a mangisapata iti kinasungdoda iti ‘Führer ken Estado,’ kas iti panagkedkedda nga agserbi iti militaria. Saan met a nakiraman dagiti annakda iti Hitler Youth Movement.”
Kinuna ni Jesu-Kristo kadagiti adalanna: “Saanda a paset ti lubong, a kas kaniak a saan a paset ti lubong.” (Juan 17:16) Gapuna, naan-anay a narelihiosuan ti nakaibatayan ti takder dagiti Saksi ni Jehova. Innayon ni Straub: “Dagiti Saksi ni Jehova, a masapul nga agisuot iti lila a trianggulo kadagiti kawesda kas balud iti kampo konsentrasion, ti kakaisuna a grupo dagiti balud a mabalin koma a mawayawayaan iti aniaman a kanito no kayatda. Umdas koman ti panangpirmada iti deklarasion a tallikudandan ti pammatida.”
Kaaduan kadagiti Saksi dida pulos pinanunot a tallikudan ti pammatida. Gapuna, agarup 1,200 kadakuada ti natay bayat ti tiempo ti Nazi. Dua a gasut ken pitopulo ti napapatay gapu iti dida panagsoldado maibatay iti konsiensiada. Nabuyogan iti aramid dagiti sasaoda: “Masapul nga agtulnogkami iti Dios kas agturay imbes a kadagiti tattao.”—Aramid 5:29.
Dagiti Saksi ni Jehova ket ordinario laeng a tattao, kas kinuna ni Ulrich Schmidt, presidente ti State Parliament of North Rhine-Westphalia. Mainaig iti sasaona, ti broshur a Landtag Intern inawaganna ida kas “ordinario a tattao a gapu iti konsiensiada, nagtakderda a natibker kadagiti narelihiosuan a patpatienda, nangipakitada iti tured kas umili, ken sinarangetda ti ideolohia ti Nazi gapu iti pammatida kas Kristiano.” Masiguradotayo a maragsakan ni Jehova a Dios kadagiti amin nga agtalinaed a nasungdo kenkuana iti sidong dagiti narigat a kasasaad. Iti Proverbio 27:11, mabasatayo: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.”
[Picture Credit Line iti panid 30]
Iti pammalubos ti United States Holocaust Memorial Museum