“Isuda a Nakabarko a Simmalog iti Baybay”

ITI sanguanan ti sangladan ti Gloucester, Massachusetts, U.S.A., nakatakder ti bronse nga estatua ti maysa a mangtimtimon iti barkona bayat ti bagyo. Dayta nga estatua ket pakalaglagipan kadagiti rinibu a mangngalap idiay Gloucester a pagaammo a natay iti baybay. Iti sakaanan ti estatua ken iti asideg a plake, nailanad ti sasao ti Salmo 107:23, 24: “Isuda a nakabarko a simmalog iti baybay, tapno agnegosio kadagiti nakadakdakkel a danum; Isuda dagidiay nakakita iti ar-aramid ti Apo, ken iti nakaskasdaaw nga ar-aramidna kadagiti kaadalman.”​—King James Version.

Napeggad a negosio ti panagkalap kadagiti nabaknang a baybay ti Atlantic. Kadagiti naglabas a tawtawen, 5,368 a tattao a taga-Gloucester, nga addaan ita iti agarup 30,000 a populasion, ti pagaammo a natay bayat ti panagkalapda. Kuna dayta a pakalaglagipan: “Dadduma ti natay gapu kadagiti napigsa nga angin ken nangangato a dalluyon a pinataud ti kasaor. Dadduma ti natay bayat a nakaluganda kadagiti babassit a bangka a naiwawa manipud kadagiti bapor a nangipan kadakuada kadagiti pagdaklisan. Dadduma a bapor ti nagdidinnungpar kabayatan ti bagyo isu a limnedda. Dadduma ti nadalapus dagiti barko.”

Dayta a pakalaglagipan ket nagserbi kas naladingit a saksi kadagiti rigat ken peggad a sinaranget dagiti mangngalap kadagiti naglabas a siglo. Panunotenyo laengen dagiti nagarubos a lua ti panagleddaang gapu kadagiti natay nga assawa, amma, kakabsat, ken annak. Nupay kasta, ni Jehova a Dios dina lipaten dagiti balo, ulila, wenno dagiti natay iti baybay. Impatuldo ni apostol Juan daytoy a mapasamak iti masanguanan: “Ti baybay inyawatna dagidiay natay nga adda kenkuana, ket ni patay ken ti Hades inyawatda dagidiay natay nga adda kadakuada.” (Apocalipsis 20:13) Inton mapagungarda, dagidiay “nakabarko a simmalog iti baybay” makitadanto dagiti agkakaimbag “nga aramid ti Apo.”