“Agestoriaka Pay!”

IDIAY Nezlobnaya, Russia, maysa a grupo ti haiskul ti mangad-adal kadagiti literatura a gapuanan ti Ruso nga autor a ni Mikhail Bulgakov. Karaman kadagiti literatura ti maysa a nobela a nangtagibassit ken ni Jesu-Kristo, idinto ta inladawanna ni Satanas kas maysa a bannuar. Kalpasan ti diskusion iti klase, nangted ti mannursuro iti maysa nga eksamen kadagiti estudiante maibatay iti dayta a nobela. Ngem maysa kadagiti estudiante nga agnagan iti Andrey, maysa a Saksi ni Jehova nga agtawen iti 16, nadayaw a kiniddawna a saan koma a mairaman iti dayta nga eksamen agsipud ta saan nga ipalubos ti konsiensiana ti panangadal iti kasta a kita ti literatura. Imbes ketdi, insingasingna a mangputar iti maysa a salaysay a mangilawlawag no ania ti panangmatmatna ken ni Jesu-Kristo. Immanamong ti mannursuro.

Iti pinutarna, inlawlawag ni Andrey a nupay raemenna ti kapanunotan dagiti sabsabali, naammuanna a ti kasayaatan a pamay-an tapno maadal ti maipapan ken ni Jesus isu ti panangbasa iti maysa kadagiti uppat a salaysay ti Ebanghelio. Babaen ti panangaramid iti dayta, “maammuanyo ti maipapan iti biag ken pannursuro ni Jesus maibatay kadagiti salaysay dagiti nakasaksi.” Innayon ni Andrey: “Ti sabali pay a rumbeng a pakaseknan ket no kasano a nadeskribir ni Satanas. Nalabit a kaay-ayo ti dadduma a basaen ti maysa a libro a mangitampok ken ni Satanas kas bannuar, ngem saan a makaay-ayo dayta kaniak.” Inlawlawagna a ni Satanas kinapudnona ket maysa a mannakabalin a dakes nga espiritu a parsua a timmallikud iti Dios, mangmangyeg iti kinadakes, rigat, ken panagsagaba iti sangatauan. Ingngudo ni Andrey ti salaysayna: “Diak patien a pagimbagak ti panangbasa iti daytoy a nobela. Siempre, saanko a kabusor ni Bulgakov. Ngem no para kaniak, ti Biblia ti kayatko a basaen tapno maammuak ti historikal a kinapudno maipapan ken ni Jesu-Kristo.”

Naay-ayo unay ti mannursuro iti salaysay ni Andrey isu a pinagsaganana iti maysa a report maipapan ken ni Jesu-Kristo. Dagus nga immanamong ni Andrey. Iti simmaganad a klaseda, binasa ni Andrey ti reportna iti sango ti intero a klase. Inlawlawagna no apay a patienna a ni Jesus ti katan-okan a tao a nagbiag. Kalpasanna, manipud iti Mateo a libro ti Biblia, nangbasa iti maysa a kapitulo maipapan iti ipapatay ni Jesus. Yantangay dandani maibusanen iti oras para iti reportna, ingudo koman dayta ni Andrey, ngem indagadag dagiti kaeskuelana: “Agestoriaka pay! Ania ti simmaganad a napasamak?” Isu nga intultuloyna a binasa ti salaysay ti Mateo maipapan iti panagungar ni Jesus.

Idi nalpasen ti report ni Andrey, nagimtuod dagiti kaeskuelana iti nagadu a saludsod maipapan ken ni Jesus ken ni Jehova. “Inkararagko nga ipaayannak ni Jehova iti sirib, ket sinungbatanna ti kararagko,” kuna ni Andrey. “Nasungbatak ti amin a saludsodda!” Kalpasan ti klase, nangted ni Andrey iti libro a Ti Katan-okan a Tao a Nagbiag Pay Laenga para iti mannursuro, a sigagagar a nangawat iti dayta. Kinuna ni Andrey: “Inikkannak iti nangato a grado gapu iti reportko ken pinadayawannak gapu ta tinakderak ti pammatik ket saanko nga ibain dayta. Kinunana pay nga isu ket umanamong iti dadduma kadagiti patpatiek.”

Maragsakan unay ni Andrey ta inkeddengna a suroten ti sinanay-Biblia a konsiensiana babaen ti saanna a panangbasa iti literatura a mangibabain ken ni Jehova ken iti Anakna, ni Jesu-Kristo. Ti kasta a takderna ket saan laeng a nangsalaknib kenkuana kadagiti di nainkasuratan a panangmatmat no di ket nanglukat pay iti nagsayaat a gundaway a mangiranud kadagiti napateg a kinapudno iti Biblia.

[Footnote]