Ipapatay​—Maysa a Nakaam-amak a Realidad!

“SIPUD pannakaipasngay ti tao, addan nga umas-assibay ni patay,” insurat ti Briton a historiador a ni Arnold Toynbee. Innayonna: “Ken talaga a dayta ti pagtungpalan ti amin a tao inton agangay.” Anian a leddaangtayo no matay ti maysa a dungdungnguentayo a kapamilia wenno nasinged a gayyem!

Iti rinibribun a tawen, ti ipapatay ket maysa a nakaam-amak a realidad a mapaspasaran ti sangatauan. Mariknatayo nga awan pulos gawaytayo no matay ti maysa nga ing-ingungoten. Dumteng ti ipapatay kadatayo amin. Awan ti makaliklik iti dayta. “Ti panagleddaang pagbalinennatayo amin a kasla ubbing​—aniaman ti naragpattayo nga edukasion. Uray ti kasisiriban dina mailawlawag dayta.” Kasta ti kinuna ti maysa a mannalaysay idi maika-19 a siglo. Agbalintayo a kasla ubbing​—awanan gaway, a di makabael a mangbalbaliw iti kasasaad. Uray dagiti nabaknang wenno dagiti mannakabalin, saanda a maisubli ti napukaw a biag. Saan met a mailawlawag dayta dagiti masirib ken nasaririt. Nabileg man wenno nakapuy, agsangitda nga agpadpada.

Ni David a nagkauna nga ari ti Israel napasaranna ti kasta a panagtuok idi natay ni Absalom nga anakna. Idi mangngegna ti damag ti ipapatay ti anakna, nagsangsangit ti ari ket kinunana: “Anakko nga Absalom, anakko, anakko nga Absalom! O siak la koman ti natay, siak, imbes a sika, Absalom nga anakko, anakko!” (2 Samuel 18:33) Nupay no maysa a nabileg nga ari ni David a nangparmek kadagiti nabileg a kabusor, awan ti naaramidanna no di ti kiddawenna nga isu ket alaen metten ti ‘maudi a kabusor, a ni patay.’​—1 Corinto 15:26.

Adda kadi solusion ti ipapatay? No adda, ania ti namnama dagiti natay? Makitatayto kadi manen dagiti natayen nga ing-ingungotentayo? Ti sumaganad nga artikulo mangipaay kadagiti Nainkasuratan a sungbat kadagitoy a saludsod.