Ti Pateg ti “Narasrasi a Basehas”
“DAKAYO nga assawa a lallaki, agtultuloykayo a makipagtaeng [kadagiti assawayo] maitunos iti pannakaammo,” insurat ni apostol Pedro, “nga itudinganyo ida iti dayaw a kas iti narasrasi a basehas, ti babai.” (1 Pedro 3:7) Ti kadi panangtukoy ti Kasuratan iti babai kas “narasrasi a basehas” tagibassitenna dagiti babbai iti aniaman a wagas? Usigentayo no ania a talaga ti kayat a sawen ti napaltiingan a mannurat.
Ti Griego a nombre a naipatarus kas “dayaw” kaipapananna ti “gatad, pateg, . . . respeto.” Gapuna, ti Kristiano nga asawa a lalaki masapul a tratuenna ti asawana buyogen ti kinadungngo, nga ibilangna kas narasi, napateg a basehas. Saan a pulos a panangtagibassit daytoy. Kas pagarigan, usigentayo ti Tiffany lotus lamp (lampara nga adda pantaliana a kas iti sukog ti sabong a lotus). Maibilang a narasi daytoy a nagpintas a lampara. Nababa kadi ti pateg daytoy a lampara gapu iti kinarasina? Nikaanoman! Idi 1997, naisubasta ti orihinal a Tiffany lotus lamp iti 2.8 milion a doliar! Ti kinarasina ti nangpangato iti pategna, saan ket a nangpababa.
Kasta met, saan a mangipababa iti pateg ti babai ti panangpadayaw kenkuana kas narasrasi a basehas. Ti pannakipagnaed ti asawa a lalaki ken ni baketna “maitunos iti pannakaammo” kaipapananna nga ikabilanganna ti paglaingan ken pagkapuyan, kayat ken saan a kayat, opinion ken rikrikna ni baketna. Ti naayat nga asawa a lalaki bigbigen ken raemenna ti nagdumaan ti personalidadda a dua. Padayawanna ni baketna ‘tapno saan a malappedan dagiti kararagna.’ (1 Pedro 3:7) No ti asawa a lalaki saanna a raemen dagiti kualidad ni baketna kas babai, agpeggad ti relasionna iti Dios. Nalawag a ti Sao ti Dios saanna a tagibassiten dagiti babbai. Imbes ketdi, padayawan ken raemenna ida.
[Picture Credit Line iti panid 32]
© Christie’s Images Limited 1997