‘Gapu iti Ubing nga Agtawen iti Siam’

TUNGGAL umay mangasaba dagiti Saksi ni Jehova iti pagtaengan ni Wiesława, nga agnanaed idiay makin-abagatan a Poland, sidadayaw nga agyaman kadakuada ngem dina kayat ti makipatang. Maysa nga aldaw, immay iti ridawna ti agtawen iti siam a ni Samuel ken ti nanang ti ubing. Iti dayta a gundaway, dimngeg ni Wiesława iti mensahe ken inawatna ti maysa a magasin maipapan iti paraiso a daga.

Yantangay asidegen ti Memorial mainaig iti ipapatay ni Jesu-Kristo, tinarigagayan ni Samuel nga awisen ni Wiesława iti daytoy a naisangsangayan nga okasion. Gapuna, simmarungkarda manen ken ni nanangna, ket addaanda iti nayimprenta nga imbitasion iti dayta a gundaway. Idi nakitana a nakadesente ti ubing, nagpakada biit ni Wiesława tapno agsukat iti maitutop a kawes. Idi nagsubli, nagimdeng ken ni Samuel, inawatna ti imbitasion, ken inyimtuodna: “Siak la kadi ti umay wenno ikuyogko ni lakayko?” Kalpasanna, kinunana: “Umayak uray saan nga umay ni lakayko. Maigapu man laeng kenka, Samuel.” Tinungpalna ti saona ket naragsakan ni Samuel.

Bayat ti palawag ti Memorial, nakikatugaw ni Samuel ken ni Wiesława ken impakitana kenkuana dagiti kasuratan a nailawlawag. Nagustuan ni Wiesława dayta.

Natagiragsakna ti Memorial ken inapresiarna ta simple ti pannakailawlawag dagiti nauneg a kapanunotan. Naparegta met iti nabara a panangabrasa kenkuana ti kongregasion ken ti kinaimbag nga impakitada. Sipud idi, rimmayray ti apresasion ni Wiesława kadagiti naespirituan a banag ken regular a makitimtimpuyogen kadagiti Saksi ni Jehova. Kinunana itay nabiit: “Mabainak gapu iti saanko idi a panagimdeng no umaykayo mangasaba. Ken aminek a dimngegak iti mensaheyo gapu laeng iti ubing nga agtawen iti siam, gapu ken ni Samuel.”

Kas ken ni Samuel, adu a dadduma pay nga agtutubo a Saksi ni Jehova ti agdaydayaw iti Dios babaen ti panagsao ken umiso a panagkawkawes ken kababalinda. No maysaka nga agtutubo, mabalinmo met a tulongan dagiti napasnek a tattao tapno maipategda dagiti agkakaimbag a naespirituan a prinsipio.