Salsaludsod Dagiti Agbasbasa
Ania ti responsabilidad ti kongregasion no aksidente a makapatay ti maysa Kristiano gapu iti panagmanehona?
Masapul a tingitingen ti kongregasion no adda biag a sungsungbatan ti drayber tapno awan koma ti biag a sungsungbatan ti kongregasion kas maysa a grupo. (Deuteronomio 21:1-9; 22:8) Mabalin nga adda biag a sungsungbatan ti drayber a nakaigapuan ti maysa a nakaro nga aksidente no isu ket saan a naannad wenno inggagarana a sinalungasing ti maysa kadagiti linteg ti trapiko wenno kinatalged nga ipatpatungpal ti gobierno. (Marcos 12:14) Ngem adda dadduma pay a banag a nasken a maikabilangan.
Masapul idi a mabista ti maysa a nakapatay a nagkamang iti maysa kadagiti siudad a pagkamangan ti Israel. No mapaneknekan a di inggagara ti naaramidna a panangpapatay, isu ket mapalubosan nga agtalinaed iti siudad, a masalakniban manipud kadagidiay agibales gapu iti napukaw a biag. (Numeros 35:6-25) Gapuna, no aksidente a nakapatay ti maysa a Kristiano, nasken a palutpoten dagiti panglakayen ti napasamak tapno matingitingda no adda biag a sungsungbatanna. Saan a ti panangmatmat ti gobierno wenno ti desision ti korte ti naan-anay a pagibatayan ti kongregasion iti tignay nga aramidenna.
Kas pagarigan, nalabit nga ikeddeng ti korte nga adda linteg ti trapiko a sinalungasing ti drayber, ngem dagiti agim-imbestigar a papanglakayen mabalin nga ikeddengda nga awan ti biag a sungsungbatanna gapu ta bassit wenno awan ti kontrolna kadagiti pasamak a nagresulta iti ipapatay ti maysa. Uray met no ti korte absueltuenna ti kaso, mabalin latta nga iti panangtingiting dagiti papanglakayen, adda biag a sungsungbatanna.
Ti desision dagiti panglakayen a mangim-imbestigar iti kaso ket nasken a naibatay iti Kasuratan ken kadagiti natalged nga ebidensia―ti panangamin ti drayber ken/wenno ti testimonia ti dua wenno tallo a mapagtalkan a saksi. (Deuteronomio 17:6; Mateo 18:15, 16) No mapaneknekan a nakabasol iti dara, nasken a mabukel ti maysa a hudisial a komite. No ikeddeng ti komite a pudno nga agbabbabawi ti tao a nakabasol iti dara, isu ket maipaayan iti maitutop a pannubngar manipud iti Nainkasuratan ken maikkat ti aniaman a pribilehiona iti kongregasion. Maikkat kas panglakayen wenno ministerial nga adipen. Mabalin met a maikkan iti dadduma pay a restriksion. Malaksid iti dayta, adda sungsungbatanna iti Dios gapu iti panagliway ken dina panagannad a nagresulta iti aksidente ken ipapatay.―Galacia 6:5, 7.
Kas panangyilustrar: No saan a nasayaat ti panniempo idi napasamak ti aksidente, rumbeng koma nga ad-adda a nagannad ti drayber. No saguyepyepen, nagsardeng ken inridepna pay koma agingga a maikkat ti tuturoganna, wenno impasublatna koma iti sabali ti panagmaneho.
No kas pagarigan ngay ta nakaparpartak ti panagpataray ti maysa a Kristiano ket limbes iti ipalubos ti linteg a kapardas ti lugan? Dayta ket saan a panangipaay ken “Cesar ti bambanag ni Cesar.” Panangipakita pay dayta iti saan a panangraem iti kinasagrado ti biag, gapu ta posible nga adda matay iti dayta. (Mateo 22:21) Mainaig iti daytoy, maitutop nga ikabilangan ti sabali pay a banag. Ania nga ulidan ti ipakpakita ti panglakayen iti kongregasion no saanna a siaannad nga annuroten dagiti paglintegan ni Cesar mainaig iti trapiko wenno igaggagarana a salungasingen dagita?―1 Pedro 5:3.
Di rumbeng a durogan dagiti Kristiano ti asinoman nga agpataray iti kapartak a maisalungasing iti linteg tapno makagtengda iti maysa a lugar iti oras a kamkamakamenda. Iti kaaduan a kasasaad, kasapulan laeng ti nasapa a panagrubbuat wenno panangbaliw iti eskediul tapno nawaya ti oras ti panagbiahe. No maaramid dayta, saan a mapilitan ti maysa a Kristiano nga agpataray iti naparpartak ngem iti ipalubos ti linteg. Imbes ketdi, maannurotna dagiti paglintegan ti trapiko nga ipapaalagad dagiti “nangatngato nga autoridad” iti gobierno. (Roma 13:1, 5) Tumulong dayta iti drayber tapno maliklikanna dagiti nakaro nga aksidente a posible a mamagbalin kenkuana a manungsungbat iti dara. Malaksid iti dayta, makaipaay pay iti nasayaat nga ulidan ken mataginayonna ti nadalus a konsiensia.―1 Pedro 3:16.