Panangsapul iti Dalan iti Naglawaan a Taaw
ADDA nasurok a 1,200 a puro ken babassit nga isla iti Marshall Islands. Kaaduan kadagitoy ti sumagmamano laeng a metro a nangatngato ngem iti patas ti baybay. Saanmo a makita dagitoy uray saanka pay a nakaadayo unay iti taaw. Ngem dagiti nagkauna a taga-Marshal Islands makapaglayagda manipud iti maysa a bassit a puro nga agturong kadagiti babassit nga isla babaen kadagiti bilog nga addaan iti pasaplak ken masurotanda ti dalanda iti agarup 2,000,000 kilometro kuadrado a Taaw Pacifico. Kasano a naaramidda daytoy? Nangusarda kadagiti simple ngem talaga nga epektibo a “mapa” a naawagan iti stick chart.
Maibatay iti kapadasan, nasursuro dagiti aglaylayag a taga-Marshall Islands a no adda maysa nga isla, mangpataud daytoy iti maysa a wagas ti panagallon a mangipalgak iti lokasion dayta nga isla uray agingga iti 30 a kilometro a kaadayo. Adu a wagas ti panagallon ti masapul a mailasin, ket dagiti stick chart makatulongda a mangipalagip. Ania ti itsura dagiti stick chart? Kas makitayo iti ladawan, nalagalaga dagitoy a ramut ti pandan wenno iit a mangirepresentar kadagiti wagas ti panagallon. Maikabit dagiti babassit a shell tapno mangtanda iti kaaddayo dagiti isla.
Iti adu a tawen, nailimed ti panaglayag babaen iti stick chart. Maipalgak laeng dayta kadagiti napili a pakaibagaanna. Kasano a masursuro ti agdadamo nga aglayag ti agusar iti stick chart? Masursurona dayta babaen laeng iti panagsanay ken panagusar. Ti agdadamo a marino ket sursuruan ti aduan kapadasan a managlayag. Nalabit ikuyogna kadagiti panaglayagna a mapan kadagiti kabangibang nga isla. Bayat a ti agdadamo masursurona nga ilasin dagiti wagas ti panagallon, maaddaanton iti panagtalek a mangusar iti bukodna nga stick chart. Inton agangay makapagsolsolon nga aglayag.
Umasping iti dayta, ti Sao ti Dios, ti Biblia, maiwanwannatayo iti dana ti biag. Iti damo, mabalin nga adda tumulong kadatayo a maaddaan iti pannakaawat kadagiti Kasuratan. Kalpasanna, bayat nga itultuloytayo nga adalen ti Sao ti Dios ken iyaplikar dagiti prinsipiona, maaddaantayo iti panagtalek iti ibagbagana. Ni Josue, a nangidaulo kadagiti Israelita, naibilin kenkuana nga itultuloyna a basaen ti Sao ti Dios tapno ‘maannadanna nga aramiden ti maitunos iti isuamin a naisurat iti dayta.’ “Iti kasta,” imbaga ti Dios ken Josue, “pagballigiemto ti dalanmo ket iti kasta agtignaykanto a sisisirib.” (Josue 1:8) Wen, mailawlawag ti Biblia kadatayo ti sigurado ken naballigi a pamay-an ti panagbiag.
[Picture Credit Line iti panid 32]
© Greg Vaughn