Mabalin Kadi a Mailinteg ti Maysa nga Ukom?

NAKAESKEDIUL ni Sladjana, maysa a Saksi ni Jehova idiay Croatia, a sumango iti pangukoman maigapu iti pinansial a parikut. Dimteng a nasapa ni Sladjana iti sanguanan ti ukom. Nupay kasta, adda dagiti karaman iti kaso a naladaw a simmangpet. Sigagagar ni Sladjana a mangasaba, isu a bayat nga agur-uray ti amin, situtured a nakisarita iti ukom.

Sinaludsodna, “Apo, ammom kadi nga iti mabiiten awanton dagiti ukom ken pangukoman ditoy daga?” Siempre, tuktukoyenna dagiti ukom a pagaammotayo ita.

Di nakatagari ti ukom a nangmingming laeng kenkuana, gapu ta nasdaaw. Kalpasanna, nangrugin ti bista. Idi nalpas ken timmakderen ni Sladjana a mangpirma iti dokumento, inyarasaas a dinamag ti ukom: “Siguradoka kadi iti imbagam kaniak nga iti mabiiten awanton dagiti ukom ken pangukoman ditoy daga?”

“Wen, Apo. Talaga a siguradoak!” kinuna ni Sladjana.

“Ania ti pammaneknekmo?” kinuna ti ukom.

“Kasta ti kuna ti Biblia,” kinuna ni Sladjana.

Imbaga ti ukom a kayatna a mabasa dayta a pammaneknek, ngem awan ti Bibliana. Isu nga intukon ni Sladjana nga iyalaanna iti maysa. Ti Saksi sinarungkaranna ti ukom, ket inikkanna iti Biblia, ken pinaregtana a linawas a makipagadal iti Biblia. Nagpayadal ti ukom ket di nagbayag nagbalin a maysa a Saksi ni Jehova.

Kastoy ti kuna dagiti naimpadtuan a sasao iti Salmo 2:10: “Ita, O ar-ari, watwatenyo ti pannakatarus; mailintegkayo koma, O uk-ukom ti daga.” Anian a makapabileg iti puso no dagiti kasta a tattao sipapakumbaba nga agpaisuroda ken ni Jehova!

[Ladawan iti panid 32]

Ni Sladjana ken ti ukom