Ti Pannakabalin ti Dila

TI DILA ti giraffe ket 45 a sentimetro ti kaatiddogna, nasiglat ken napigsa a mangruros iti bulbulong kadagiti sanga ti kayo. Agkadagsen ti dila ti elepante ken ti blue whale. Kasapulan ti adu a pigsa tapno aggaraw dayta!

Awan kaimudingan ti dila ti tao no idilig ti kadakkel, timbang, ken pigsana. Ngem adayo a nabilbileg dayta. Kuna ti Biblia maipapan iti daytoy bassit a kameng ti bagi: “Ti ipapatay ken biag addada iti pannakabalin ti dila.” (Proverbio 18:21) Kinapudnona, namin-anon a nangngegtayo a makapapatay ti dila no mangisawang dayta iti kinaulbod ken palso a pammaneknek a nakadadaelan ken nakatayan pay dagiti inosente a biktima?

Kasta met, nadadael dagiti nabayagen a panaggagayyem gapu kadagiti makapasakit a sasao. Nasaktan dagiti rikna gapu kadagiti nagubsang a sasao. “Kasanonto kabayag nga itultuloyyo a ruroden ti kararuak ken itultuloydak nga idagel babaen iti sasao?” inyikkis ti maum-umsi unay a ni Job. (Job 19:2) Naglawag ti panangiladawan ni adalan a Santiago iti makadangran a pannakabalin ti di mapengdan a dila: “Ti dila ket bassit a kameng ngem nupay kasta agaramid kadagiti dadakkel a kinapangas. Adtoy! Anian a nagbassit nga apuy ti kasapulan a panguram iti dakkel unay a kakaykaywan! Ala ket, ti dila maysa nga apuy.”​—Santiago 3:5, 6.

Iti sabali a bangir, adda met abilidad ti dila a mangparayray iti biag. Dagiti prangka ken makaliwliwa a sasao natulonganna ti dadduma a mangiwaksi iti nakaro a panagliday ken panagpakamatay. Naispal iti nasapa nga ipapatay ti adu nga agdrogdroga ken kriminal idi impangagda ti nasayaat a balakad. Pudno a “kayo ti biag” ti bunga ti dila ti nalinteg, ken “kas kadagiti mansanas a balitok kadagiti kitikit a pirak kasta ti sao a naisao iti umiso a tiempona.”​—Proverbio 15:4; 25:11.

Ngem ti panangidayaw ken Jehova a Dios, panangiwaragawag iti naimbag a damag ti Pagarian ti Dios, ken panangisuro kadagiti sabsabali kadagiti napapateg a kinapudno iti Biblia, ti kasayaatan a pakausaran ti dila. Apay? Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3; Mateo 24:14; 28:19, 20.