“Mapanka Agdiram-os Idiay Ban-aw ti Siloam”
KALPASAN a pinaimbagna ti maysa a bulsek a lalaki babaen ti pitak, kinuna ni Jesus kenkuana: “Mapanka agdiram-os idiay ban-aw ti Siloam.” Nagtungpal ti lalaki ket “nagsubli a makakitan.” (Juan 9:6, 7) Sadino ti Ban-aw ti Siloam? Itay nabiit, adda naammuan ti arkeolohia a baro nga impormasion maipapan iti pakasarakan iti dayta.
Adun a turista ti pimmasiar iti maysa a lugar idiay Jerusalem a naawagan iti Ban-aw ti Siloam, ta patienda nga isu dayta ti ban-aw a nadakamat iti Juan 9:7. Masarakan dayta a lugar iti ungto ti usok ni Ezekias—530 a metro ti kaatiddogna nga usok ti danum a naaramid idi maikawalo a siglo K.K.P. Ngem iti kinapudnona, napetsaan dayta a ban-aw iti maikapat a siglo K.P. Inaramid dayta dagiti Bizantino a “Kristiano” a sibibiddut a nangipagarup nga iti ungto dayta nga usok ti pakasarakan iti ban-aw a nadakamat iti Ebanghelio ni Juan.
Ngem idi 2004, nasarakan dagiti arkeologo ti patienda a Ban-aw ti Siloam idi adda ni Jesus ditoy daga. Ti ayan dayta ket agarup sangagasut a metro iti abagatan a daya ti lugar a sibibiddut a naipagarup a pakasarakan iti Ban-aw ti Siloam. Kasano a nasarakanda dayta? Dagiti opisial iti siudad kasapulan a tarimaanenda idi ti tubo a pagayusan ti rugit iti dayta a lugar, isu a nangibaonda kadagiti trabahador nga addaan kadagiti dadakkel nga instrumento. Maysa nga arkeologo nga agtartrabaho iti asideg ti nangpaliiw iti naaramid a panagkali ket nakitana ti panagparang ti dua a tukad ti agdan. Napasardeng ti trabaho, ket inanamongan ti Israeli Antiquities Authority a makabakab dayta a lugar. Nakabakaben ti maysa a bangir ti ban-aw, nga agarup 70 a metro ti kaatiddogna, ken ti dua a sulina.
Bayat ti panagkabakab, adda dagiti nasarakan a sinsilio a nausar idi maikadua, maikatlo, ken maikapat a tawen ti panagrebelde dagiti Judio maibusor iti Roma. Napasamak dayta a rebelion iti nagbaetan ti 66 ken 70 K.P. Paneknekan dagita a sinsilio a nausar ti ban-aw agingga idi 70 K.P. idi dinadael dagiti Romano ti Jerusalem. Inngudo ti periodiko a Biblical Archaeology Review: “Nausar ngarud ti ban-aw agingga iti panagngudo ti rebelion, sa nabaybay-an kalpasanna. Dayta a kababaan a lugar iti intero a Jerusalem ket saanen a napagnaedan agingga idi panawen dagiti Bizantino. Iti kada tawen, ti ban-aw ket manaynayonan iti pitak nga inyanud dagiti tudo bayat ti tiempo ti lam-ek. Ket kalpasan ti panangdadael dagiti Romano iti siudad, saanen a nadalusan ti ban-aw. Kadagiti naglabas a siglo, nagtultuloy a pimmuskol ti pitak agingga a napukawen ti ban-aw. Dagiti arkeologo nasarakanda ti dadduma a paset dayta a nagabburan iti tallo a metro a pitak.”
Apay a dagiti napasnek nga agad-adal iti Biblia interesadoda iti lugar a pakasarakan iti Ban-aw ti Siloam? Agsipud ta tumulong dayta a mangpasayaat iti pannakaawatda maipapan iti luglugar iti Jerusalem idi umuna a siglo, a masansan a madakamat kadagiti salaysay ti Ebanghelio maipapan iti biag ken ministerio ni Jesus.
[Ladawan iti panid 7]
Ti nabiit pay a nasarakan a Ban-aw ti Siloam
[Credit Line]
© 2003 BiblePlaces.com