Salsaludsod Dagiti Agbasbasa
Yantangay opisial a mangrugi ti panagani no amin a lallaki nga Israelita ket tumabunoda iti Piesta Dagiti Di Pinaalsa a Tinapay, siasino ti nagani iti umuna a bungbunga ti sebada a naipan iti santuario?
Kastoy ti imbilin ti Mosaiko a Linteg kadagiti Israelita: “Mamitlo iti makatawen a ti tunggal lalaki kenka rebbeng nga agparang iti sango ni Jehova a Diosmo iti disso a piliennanto: iti piesta dagiti di pinaalsa a tinapay ken iti piesta dagiti lawas ken iti piesta dagiti abong-abong.” (Deuteronomio 16:16) Sipud idi panawen ni Ari Solomon ken nagpatpatuloy, ti lugar a pinili ti Dios ket ti templo idiay Jerusalem.
Ti umuna kadagiti tallo a piesta ket naangay iti umuna a paset ti primavera. Naawagan dayta iti Piesta Dagiti Di Pinaalsa a Tinapay ket nangrugi dayta iti aldaw kalpasan ti pannakangilin ti Paskua iti Nisan 14 ken nagtultuloy iti pito nga aldaw agingga iti Nisan 21. Maibatay iti sagrado a kalendario, ti maikadua nga aldaw ti piesta, ti Nisan 16, isu ti pangrugian ti umuna a panagaapit iti tawen. Iti dayta nga aldaw, maited iti nangato a padi ti “sangabettek ti umuna a bungbunga” ti naapit a sebada sana ilili nga “agsublisubli iti sanguanan ni Jehova” iti santuario. (Levitico 23:5-12) Yantangay kasapulan a dumar-ay dagiti amin a lallaki iti Piesta Dagiti Di Pinaalsa a Tinapay, siasino ti nagapit iti maidaton?
Ti panangidaton kenni Jehova iti umuna a bungbunga ti apit bayat ti Piesta Dagiti Di Pinaalsa a Tinapay ket naibilin iti intero a nasion. Saan a kasapulan nga agapit ti tunggal indibidual sana iyeg a bukodna iti santuario ti umuna a bungbunga. Imbes ketdi, adda dagiti indibidual a nangaramid iti bilin kas pannakabagi ti nasion. Gapuna, ti panaggapas kadagiti binettek para iti Piesta Dagiti Di Pinaalsa a Tinapay ket mabalin nga inaramid ti maysa a grupo a naibaon iti asideg a nakaimulaan ti sebada. Iti panangkomentona iti daytoy, kuna ti Encyclopaedia Judaica: “No natangkenanen ti sebada, maala dayta manipud iti aglawlaw ti Jerusalem; no saan, mabalin a maala dayta sadinoman iti Israel. Apiten dayta ti tallo a lallaki, a tunggal maysa ket addaan iti kumpay ken kuribot.” Kalpasanna, maysa a binettek a sebada ti maited iti nangato a padi, a mangidaton iti dayta kenni Jehova.
Babaen ti bilin a panangidaton iti umuna a bungbunga ti apit, naipaayan dagiti Israelita iti nagsayaat a gundaway a mangipakita iti panagyamanda iti panangbendision ti Dios iti daga ken apitda. (Deuteronomio 8:6-10) Ngem napatpateg pay ngem iti dayta, ti seremonia a panagdaton ket “anniniwan ti naimbag a bambanag nga umay.” (Hebreo 10:1) Makapainteres, napagungar ni Jesu-Kristo idi Nisan 16 ti 33 K.P., ti aldaw a maidaton kenni Jehova ti umuna a bungbunga ti apit. Mainaig kenni Jesus, insurat ni apostol Pablo: “Ni Kristo naibangonen manipud kadagiti natay, ti umuna a bungbunga kadagidiay naturog ken patay. . . . Ngem tunggal maysa iti bukodna a saad: ni Kristo ti umuna a bungbunga, kalpasanna dagidiay kukua ti Kristo kabayatan ti kaaddana.” (1 Corinto 15:20-23) Ti binettek ti umuna a bungbunga nga inlili ti nangato a padi nga agsublisubli iti sanguanan ni Jehova iladawanna ni napagungaren a Jesu-Kristo—daydiay umuna a napagungar agpaay iti biag nga agnanayon. Linuktan ngarud ni Jesus ti dalan tapno mawayawayaan ti sangatauan manipud basol ken ipapatay.
[Picture Credit Line iti panid 26]
© 2003 BiblePlaces.com